„ოცნების ქალაქში“ მცხოვრებლები ამბობენ, რომ დასახლებაში მოუწესრიგებელია ელექტროგაყვანილობები, მოხმარებული ელექტროენერგიის აღრიცხვის სისტემა და „ენერგო-პრო ჯორჯიასგან“ პრობლემის მოგვარებას ითხოვენ.
„ენერგო-პრო ჯორჯიას“ ხელვაჩაურის ოფისს არაერთხელ მივმართეთ, ფოტოებიც კი გადავუგზავნეთ, მაგრამ პრობლემა დღემდე მოუგვარებელია. ხარვეზებია, ხან ერთი სახლი იწვის, ხან – მეორე. ზედმეტსაც გვახდევინებენ“, – გვითხრა ერთ-ერთმა მცხოვრებმა.
„ბათუმელები“ „ენერგო-პრო ჯორჯიას“ დაუკავშირდა.
„აღნიშნულ დასახლებაში ,,ენერგო-პრო ჯორჯია“ ელქსელს არ ფლობს. დასახლებაში მცხოვრებლებს კი არ გააჩნიათ საკუთრების დამადასტურებელი დოკუმენტი. კომპანია ხელმძღვანელობს მოქმედი კანონმდებლობით. შესაბამისად, მათი ინდივიდუალურ აბონენტებად დარეგისტრირება ვერ მოხერხდება. იმისთვის, რომ მოსახლეობას ელენერგიით სარგებლობის შესაძლებლობა მისცემოდა, ,,ენერგო-პრო ჯორჯიამ“ გამოიჩინა კეთილი ნება და დაამონტაჟა რამდენიმე მრიცხველი.
ამ ეტაპზე მოქალაქეები აღნიშნული საერთო მრიცხველებით იღებენ ელენერგიას. კომპანიამ ასევე გაითვალისწინა, რომ მათ საკუთრებაში არსებული მოუწესრიგებელი ქსელის გამო შესაძლო იქნებოდა დანაკარგის არსებობაც, ამიტომ ისინი სარგებლობენ პირველი საფეხურის, ანუ ყველაზე დაბალი ტარიფით – 14,23 თეთრით კილოვატ საათზე. რაც შეეხება კომპანიის საკუთრებაში არსებულ მრიცხველებს, მათი შემოწმება ინტენსიურად ხორციელდება, ამ დრომდე და ამჟამადაც მრიცხველები გამართულად მუშაობს.
ახალი წლის პერიოდში ,,ენერგო-პრო ჯორჯიამ“ სატრანსფორმატორო პუნქტში და მათი საერთო მოხმარების მრიცხველებზე, ავტომატური ამომრთველები შეცვალა, თუმცა მოსახლეობის მფლობელობაში არსებული მოუწესრიგებელი ქსელის გამო ისევ დაზიანდა, რაც ამ ეტაპზე შეცვლას საჭიროებს. სამუშაოების შესასრულებლად მისულ ტექნიკურ ჯგუფებს ადგილობრივებმა მუშაობის შესაძლებლობა არ მისცეს“, – მოგვწერეს „ენერგო-პრო ჯორჯიადან“.
ელექტროსადენები და ავტომატური ამომრთველები „ოცნების ქალაქში“
ამავე თემაზე „ბათუმელების“ არქივიდან:
მთავრობა მეჯინისწყლის დასახლებაში, „ოცნების ქალაქთან“ საცხოვრებელი კომპლექსის აშენებას გეგმავს, სადაც ბინები „ოცნების ქალაქში“ მცხოვრებ ოჯახებს უნდა გადასცენ. საცხოვრებელი კომპლექსის პროექტირებაზე ხელშეკრულება აჭარის ფინანსთა და ეკონომიკის სამინისტრომ ამხანაგობა „ინჟარქიტექტისთან“ უკვე გააფორმა. ხელშეკრულების საერთო ღირებულება 320 ათას ერთი ლარია.
ამ თემაზე:
„ოცნების ქალაქში“ კორპუსს სპორტსკოლის დამპროექტებელი კომპანია დააპროექტებს
