საპროტესტო აქცია ბათუმის რეფერალურ საავადმყოფოსთან გარდაცვლილი მელანო ფუტკარაძის ახლობლებმა მოაწყვეს. ამ წუთებში ისინი საავადმყოფოსთან იმყოფებიან და ერთ-ერთი ექიმის სამსახურიდან გაშვებას ითხოვენ.
“გამოვიდეს ექიმი ეკა და გაგვცეს პასუხი… სანამ არ დაგველაპარაკებიან, აქედან არ წავალთ,” – აცხადებენ გარდაცვლილის ოჯახის წევრები. მათ დაცვის სამსახური ექიმთან შეხვედრას დაჰპირდა.
შეკრებილები ასევე ითხოვენ რეფერალურ საავადმყოფოში ექოსკოპიის განყოფილების ხელმძღვანელის სამსაზურიდან გაშვებასაც. ოჯახის პრეტენზიები სწორედ ამ განყოფილების ექიმებს უკავშირდება – გარდაცვლილის ახლობლების აზრით, მდგომარეობა სწორად მათ ვერ შეაფასეს სათანადოდ, რამაც ახალგაზრდა ქალის სიცოცხლე იმსხვერპლა.
საპროტესტო აქცია რეფერალურთან
საპროტესტო აქცია რეფერალურთან
29 წლის მელანო ფუტკარაძე 21 მარტს ღამით მწვავე აპენდიციტის დიაგნოზით გარდაიცვალა “მედცენტრში”. გარდაცვლილის ახლობლებს პრეტენზია რეფერალურ საავადმყოფოსთან აქვთ, სადაც მელანო ფუტკარაძე სამკურნალოდ თავდაპირველად მივიდა.
“მას ვერ დაუსვეს დიაგნოზი და სახლში გაუშვეს,” – ირწმუნებიან გარდაცვლილის ახლობლები.
გარდაცვლილი გოგოს ახლობლებმა ბათუმის რეფერალურ საავადმყოფოსთან მდუმარე აქცია დღეს დილითაც გამართეს.
გარდაცვლილის ცხედარს ექსპერტიზა დღეს დილით ჩაუტარეს. გამოძიება სსკ-ის 116-ე მუხლით გრძელდება, რაც გულისხმობს გაუფრთხილებლობით სიცოცხლის მოსპობას.
