გამოცდების ეროვნული ცენტრი: 2019 წელს ეროვნულ გამოცდებზე რაიმე ცვლილება არ იგეგმება

შეფასებისა და გამოცდების ეროვნული ცენტრის განმარტებით,  2019 წელს  ერთიანი ეროვნული გამოცდები, წინა წლების მსგავსად, ნაწილობრივ ელექტრონული ფორმატით ჩატარდება და ამ მიმართულებით ცვლილება არ იგეგმება.

„რაც შეეხება სამომავლო პერსპექტივას,  სრულად ელექტრონულ ფორმატზე გადასვლას  ან ვიდეოდავალებების ინტეგრირებას, ეს არის სამომავლო გეგმა და  ამას  სჭირდება განსაკუთრებული  მომზადება.

მნიშვნელოვანი ფაქტორია აბიტურიენტების  მზაობაც.  ამ მიმართულებით მიმდინარეობს მუშაობა და შესაძლოა ჩატარდეს მცირე ჯგუფთან პილოტირება ამ ტიპის შეფასების მოსამზადებლად, თუმცა ვიდეოდავალებების გამოყენება არ იგეგმება არც პილოტირების ეტაპზე,“- უთხრეს „ბათუმელებს“ გამოცდების ეროვნულ ცენტრში.

ცენტრის ხელმძღვანელმა სოფო გორგოძემ „ნეტგაზეთთან“ საუბარში აღნიშნა, რომ სკოლის გამოცდებთან დაკავშირებით, კარგი იქნება, თუ „ყოველ წელს მოხდება საგნების როტაცია“, თუმცა ის ამავე დროს დასძენს, რომ ეს არის მხოლოდ სურვილი და ამასთან დაკავშირებით ცენტრს რაიმე გადაწყვეტილება არ მიუღია.

„მიმდინარეობს კონსულტაციები, გრძელდება მსჯელობა. ცენტრი მზად არის  შენიშვნებისა და განსხვავებული მოსაზრებების მოსასმენად. ეს არის სამუშაო პროცესი და ამ პროცესში ჩართულია ყველა დაინტერესებული მხარე. დეტალური ინფორმაცია ეტაპობრივად გამოქვეყნდება“.

გამოცდების ეროვნულ ცენტრში ამბობენ, რომ დისკუსიები და კონსულტაციები იმისთვის იმართება, რომ  „პროფესიონალების, დაინტერესებული მხარეების  აზრი მაქსიმალურად გავითვალისწინოთ და შემოთავაზებული მოდელი დავხვეწოთ. გადაწყვეტილებები კი საზოგადოებას წინსწრებით გავაცნოთ“.

2019 წლის ერთიან ეროვნულ გამოცდებზე სიახლე ოთხ გამოცდას (ქართულ ენასა და ლიტერატურას, ლიტერატურას, გეოგრაფიასა და უცხოურ ენებს) შეეხება. მნიშვნელოვანი სიახლეა გრანტის განაწილების წესშიც: გასულ წლებში ორი ან მეტი არჩევითი საგნის ჩაბარებისას ერთ-ერთ მათგანში ჩაჭრის ან გამოცდაზე არგამოცხადების შემთხვევაში აბიტურიენტი კარგავდა გრანტის მიღების შესაძლებლობას, ახლა ეს შეზღუდვა მოხსნილია და აბიტურიენტს გრანტის მიღების შესაძლებლობა ამ შემთხვევაშიც აქვს.