ნატოს საინფორმაციო ცენტრი საქართველოს რეგიონებში მოსახლეობასთან უშუალო შეხვედრებს იწყებს. 18 თვის განმავლობაში ევროინტეგრაციის თემებზე სხვადასხვა სპიკერი ისაუბრებს, მოსახლეობას კი კონკრეტულ კითხვებზე პასუხის მიღება შეეძლება.
რეგიონებში ევროინტეგრაციის თემებზე 600-ზე მეტი დისკუსია გაიმართება.
“ამ პროექტის ფარგლებში აჭარის რეგიონში დაგეგმილია 100 შეხვედრა… სპიკერები სხვადასხვა არასამთავრობო ორგანიზაციის წარმომადგენლები იქნებიან,” – ამბობს ირმა გაბინაშვილი, ნატოს საინფორმაციო ცენტრის რეგიონული წარმომადგენელი.
მისივე თქმით, დისკუსიების ერთ-ერთი მთავარი თემა ანტიდასავლური პროპაგანდა იქნება.
პირველი შეხვედრა დღეს, ბათუმში, საკრებულოს სხდომათა დარბაზში გაიმართა. ირაკლი ტაბლიაშვილმა თანამედროვე კონტექსტზე ისაუბრა ნატოსთან ინტეგრაციის კუთხით.
ირაკლი ტაბლიაშვილმა იმ ქვეყნების შესახებაც ისაუბრა, რომლებიც წლების წინ ნატოს წევრები არ იყვნენ და იყო სკეპტიკური დამოკიდებულება ევროინტეგრაციის რეალურობაზე.
დღევანდელ შეხვედრას საკრებულოს წევრები და მერიის ადმინისტრაციული ორგანოს წარმომადგენლები ესწრებოდნენ.
