საქალაქო ავტობუსები ბონის მიმართულებით ბაზართან აღარ გაივლიან – დროებითი მარშრუტი


ბათუმის მუნიციპალური ავტობუსები N: 15, 8, 4, 1 და 1ა,  ქალაქიდან ბონის მიმართულებით მოძრაობისას მაიაკოვსკის ქუჩაზე მდებარე სავაჭრო ცენტრ „ბონთან“ [ფარეხი, ბაზარი] აღარ გაივლიან. მიზეზი, როგორც „ბათუმის ავტოტრანსპორტში“ გვითხრეს, მაიაკოვსკის ქუჩის მონაკვეთის ჩაკეტვაა ავტოსადგურის მიმდებარედ, სადაც გზის სარეკონსტრუქციო სამუშაოები მიმდინარეობს.

N1 და N15 საქალაქო ავტობუსები გოგებაშვილის ქუჩიდან მანთაშევის შლაგბაუმზე აღარ გადადიან და მიდიან ბაქოს ქუჩით. N15 აგრძელებს გზას, N1 კი გადადის ბარცხანის ხიდზე. ქალაქში ეს ავტობუსები უკან ბრუნდებიან მაიაკოვსკის ქუჩით, რა დროსაც ისინი გამოივლიან ბონის ბაზართან.

N8, N4 და N1ა ავტობუსები კი წერეთლის ქუჩიდან შავშეთის ქუჩის გავლით გადავლენ ბაგრატიონის ქუჩაზე და ამ ქუჩით იმოძრავებენ ბონის კულტურის სახლამდე [გოგოლის ქუჩა]. ეს ავტობუსები უკან, ქალაქში დაბრუნდებიან მაიაკოვსკის ქუჩით, ანუ, უკანა მიმართულებაზე ეს ავტობუსებიც გამოივლიან ბონის ბაზართან.

ბათუმში ყველაზე მეტი მგზავრი N1 და N1ა ავტობუსს ჰყავს. ყოველ შემთხვევაში, ასეთია 2019 წლის იანვრის სტატისტიკა – ზამთრის პირველ თვეს ამ ხაზის ავტობუსებით ბათუმში ჯამში 181 809 მგზავრმა ისარგებლა.

დროებითი მარშრუტი შენარჩუნდება მანამ, სანამ ავტოსადგურთან, მაიაკოვსკის ქუჩაზე სამუშაოები არ დასრულდება. ამ სამუშაოების დასრულების შემდეგ კი მაიაკოვსკის ქუჩის სხვა მონაკვეთი გადაიკეტება, შესაბამისად, შესაძლოა საქალაქო ავტობუსების ეს დროებითი მარშრუტიც შეიცვალოს.

ამ თემაზე:

მაიაკოვსკის ქუჩა ნაწილ-ნაწილ გადაიკეტება – სამუშაოები უკვე დაიწყო

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com