„ორი კვირით შემირიგდი და მერე გამშორდი“ – ქმარი ცოლს მოკვლით ემუქრება


ქობულეთის ერთ-ერთ სოფელში მცხოვრებ ქალს ქმარი სიცოცხლის მოსპობით ემუქრება. გუშინ, 25 თებერვალს, ჩაქვის პოლიციის განყოფილებამ ამ ფაქტზე გამოძიება დაიწყო და ქმრის წინააღმდეგ შემაკავებელი ორდერი გამოსცა.

„ცოლ-ქმარი განქორწინებული არ არის, თუმცა ერთად აღარ ცხოვრობენ. ქმარი სასჯელს იხდიდა და  ციხიდან ახლახან გამოვიდა, რის შემდეგაც  მეუღლეს ემუქრება მოკვლით, თუ არ შეურიგდებოდა. ძირითადად sms-ებს უგზავნიდა, სადაც წერდა, რომ ორი კვირით მაინც შეურიგდეს და მერე შეუძლია გაშორდეს… მათ ორი მცირეწლოვანი შვილი ჰყავთ. ბავშვები დედასთან არიან,“ – გვიყვება ანნა მდინარაძე, „ახალგაზრდა იურისტთა ასოციაციის“ აჭარის ფილიალის ხელმძღვანელი. ეს ორგანიზაცია ქალის ინტერესების იცავს, რომელიც ახლა უკვე მეუღლესთან განქორწინებასაც გეგმავს.

კაცი, რომელიც ცოლს მოკვლით ემუქრება, თბილისში ცხოვრობს. ის ამ დროისთვის დაკავებული არ არის. მსხვერპლის თქმით, მასზე მეუღლე ციხეში მოხვედრამდე ფიზიკურადაც ძალადობდა, თუმცა ქალს პოლიციისთვის არ მიუმართავს. კაცის დაპატიმრების შემდეგ ქალი მშობლების ოჯახში დაბრუნდა. კაცი ძარცვისთვის და იარაღის უკანონო ტარებისთვის იხდიდა სასჯელს.

შინაგან საქმეთა სამინისტროს ინფორმაციით, გამოძიება სატელეფონო შეტყობინების საფუძველზე დაიწყო სისხლის სამართლის კოდექსის 11 პრიმა 151-ე მუხლის შესაბამისად, რაც გულისხმობს მუქარას ოჯახში ძალადობის ნიადაგზე.

ნეტგაზეთის მასალების სხვა გამოცემებში გადაბეჭდვის წესი
ავტორი