„შევძელი“ და ქართული ღვინის სხვა უძველესი ეტიკეტები გამოფენაზე ქედაში


დღეს, 14 თებერვალს, ,,აჭარულ ღვინის სახლში“ ახალი საგამოფენო სივრცე გაიხსნა. საგამოფენო სივრცეში ხარიტონ ახვლედიანის სახელობის მუზეუმში დაცული ღვინის ეტიკეტები იყო წარმოდგენილი.

„უძველესი ღვინის ეტიკეტი, რომელიც 1907 წლითაა დათარიღებული და ჩვენთან ინახება, არის „დანელია და კომპანიას“ მიერ გამოშვებული“, – ამბობს აჭარის მუზეუმის დირექტორი თამარ ორაგველიძე.

მისივე თქმით, ამ ეტიკეტებიდან ირკვევა, რომ აჭარაში ჯერ კიდევ მანამდე აკრავდნენ ღვინოს ეტიკეტებს, სანამ ის სავალდებულო გახდებოდა მეწარმეებისთვის.

„ზოგ ეტიკეტზე მცირე სლოგანია დატანილი. მაგალითად, „დანელია და კომპანიას“ გამოტანილი აქვს სიტყვა „შევძელი“. მეცხრამეტე საუკუნის ბოლოს, მეოცეს დასაწყისში, ისეთი სერიოზული კონკურენციის დროს, როდესაც როტშილდი და მანთაშევი თავიანთ ბიზნესს ავითარებდნენ, ვლადიმერ დანელიამ შეძლო თავისი ღვინის ბიზნესის განვითარება და ლოგოზეც დაგვიწერა – „შევძელი“. ეტიკეტზე ასევე გამოსახა ჯვარი, ფუტკარი და ფიჭა, დაარქვა საეკლესიო ღვინო. ამით მომხმარებლებს უთხრა, რომ მარხვის დროს შეგიძლიათ ქარხნული ღვინოც კი მიიღოთ თავისუფლადო. იმიტომ, რომ დანარჩენი ქარხნული ღვინოები იფილტრებოდა ჟელატინით, რაც შეიცავდა ცხოველურ ცხიმებს,“ – ამბობს თამარ ორაგველიძე, მუზეუმის დირექტორი.

მეოცე საუკუნის დასაწყისში წარმოებული ღვინის ეტიკეტები

ხარიტონ ახვლედიანის ფონდების მთავარი მცველი ნანა ქორიძე გვიყვება, რომ მათ მუზეუმში სხვადასხვა ეტიკეტის კოლექციაა დაცული. მათ შორის თამბაქოს, ლიქიორის, არყისა და ღვინის.

„ეს ეტიკეტები იმით არის მნიშვნელოვანი კიდევ, რომ 1920-1930 წლების ეტიკეტები იბეჭდებოდა ბათუმში, ხვინგიას სტამბაში, ყოფილი ლუქსემბურგის ქუჩაზე, რომელიც ახლა მერაბ კოსტავას ქუჩის სახელს ატარებს.

ეტიკეტებს უკვეთავდნენ როგორც ადგილობრივი მეწარმეები, ისე მთელი დასავლეთი საქართველოდან. ეს კიდევ მანიშნებელია იმის, თუ ღვინის როგორ ძლიერ კულტურასთან გვაქვს საქმე. 150-ზე მეტი სახეობის ყურძნის ჯიშია დაფიქსირებული აჭარაში,“ – ამბობს ნანა ქორიძე.

მისივე თქმით, ეტიკეტების ნაწილი მუზეუმში კერძო კოლექციებიდან მოხვდა, ნაწილი კი – მუზეუმმა შეიძინა.

დღეს გამართულ გამოფენაზე აჭარის მუზეუმსა და აჭარულ ღვინის სახლს შორის თანამშრომლობის მემორანდუმი გაფორმდა. სამომავლოდ მუზეუმი და ღვინის სახლი ერთობლივ, სხვადასხვა საგამოფენო, საგანმანათლებლო და კულტურული ღონისძიებებს შესთავაზებს დამთვალიერებელს. აჭარული ღვინის სახლის ტერიტორიაზე კი დაგეგმილია ღვინის თემატიკასთან დაკავშირებული მუზეუმის დაარსება.

იმერული ღვინის ეტიკეტი

ღვინო “წითელი ოქტომბერი”

მეოცე საუკუნეში წარმოებული ღვინის ეტიკეტები

ღვინო “ხუცუბანი”

ღვინო “ზვარე”

ნეტგაზეთის მასალების სხვა გამოცემებში გადაბეჭდვის წესი
ავტორი