შუახევი-ხულო-გოდერძის გაზსადენის გზშ მზადაა


შუახევი-ხულოს [ხიჭაურის დასახლებიდან გოდერძის უღელტეხილამდე] 54 კმ სიგრძის ბუნებრივი აირის მილსადენის მშენებლობაზე ტენდერი, სავარაუდოდ, 2019 წლის მარტის შემდეგ გამოცხადდება. ხიჭაურამდე ცენტრალური მილსადენი მიყვანილია, აქედან კი, პროექტით, მილსადენი კვლავ ბათუმი-ახალციხის მაგისტრალს გაუყვება და გოდერძის უღელტეხილთან შეუერთდება ადიგენიდან მომავალ მილსადენს. ამით შეიკვრება წრედი, რითაც აჭარა ბუნებრივ აირს მიიღებს, როგორც ქობულეთის, ასევე, ხულოს მხრიდან.

საპროექტო კომპანიამ [„გაზპროექტი 2009“] საქართველოს გარემოს დაცვისა და სოფლის მეურნეობის სამინისტროში განცხადება გარემოსდაცვითი გადაწყვეტილების მიღებაზე [გზშ-ს დამტკიცებაზე] 2019 წლის 15 იანვარს წარადგინა. სამინისტრომ ადმინისტრაციული წარმოება შეაჩერა და კომპანიას მოსთხოვა დამატებით წარმოედგინა ატმოსფერულ ჰაერში მავნე ნივთიერებათა ზღვრულად დასაშვები გაფრქვევის ნორმების პროექტი, რაც კომპანიამ უკვე წარადგინა.

დღეს დაინტერესებულ მხარეებს საშუალება აქვთ  გზშ-ს ანგარიშთან დაკავშირებული შენიშვნები თუ მოსაზრებები წერილობით წარადგინონ სამინისტროში 2019 წლის 29 მარტამდე.

„გზშ-ს დამტკიცების შემდეგ გამოცხადდება ტენდერი სამშენებლო სამუშაოების შესყიდვაზე. პროექტით, მილსადენის მშენებლობა დაიწყება ხიჭაურიდან დაბა ხულომდე. ხულოდან გოდერძიმდე კი მაგისტრალის რეკონსტრუქციაა დაგეგმილი და გზის სამუშაოების პარალელურად იმუშავებენ მილსადენის გაყვანაზეც. ანუ, ხულოდან-გოდერძიმდე მილსადენის მშენებლობა გზის სამუშაოებზე იქნება  დამოკიდებული,“ – განაცხადა „ბათუმელებთან“ კომპანია „გაზპროექტი 2009“-ის დირექტორმა კობა ლომიძემ.

შუახევი [ხიჭაურის დასახლება]-გოდერძის უღელტეხილის მონაკვეთზე [ზანკები] საშუალოწნევიანი გაზსადენის მშენებლობისთვის აჭარის 2019 წლის ბიუჯეტში 13 მილიონი ლარია გათვალისწინებული. შესაბამისად, ტენდერს აჭარის სამინისტრო გამოაცხადებს.

ხულო-გოდერძი-ზარზმის ახალ საავტომობილო მაგისტრალს კი, საქართველოს გზების დეპარტამენტის ინფორმაციით, „საერთაშორისო ტენდერში გამარჯვებული იტალიური კომპანია „ტოდინი“ ააშენებს.

ამ თემაზე: 110-მილიონიანი ტენდერი კომპანიას, რომელმაც 30-მილიონიანი სამუშაო ვერ შეასრულა

შუახევი[ხიჭაურის დასახლება] – გოდერძის უღელტეხილის[ზანკები] მონაკვეთზე ბუნებრივი აირის მილსადენის სამშენებლო დოკუმენტის პროექტის შედგენაზე აჭარის ფინანსთა და ეკონომიკის სამინისტროს ხელშეკრულება ტენდერში გამარჯვებულ შპს „გაზპროექტი 2009“-სთან 295 ათას ლარზე აქვს გაფორმებული.

ამ თემაზე: შუახევი-ხულოს [გოდერძი] გაზსადენის პროექტირებაზე მუშაობა დაწყებულია

ამ ეტაპზე უშუალოდ მაღალმთიანი აჭარის დასახლებული პუნქტების [სოფლების] დაქსელვაზე აჭარის მთავრობას არც პროექტი აქვს და არც ფინანსები გამოყოფილი. ჯერ კიდევ არ არის გადაწყვეტილი, ვინ დააფინანსებს შესაბამის სამუშაოებს [ანუ სოფლებში ბუნებრივი აირის შეყვანას] – საქართველოს, აჭარის მთავრობა, თუ მუნიციპალიტეტებსაც ჩართავენ.

ამ თემაზე: როდის მიიღებს ბუნებრივ გაზს აჭარის მთის მოსახლეობა

ხულოში კურორტ გოდერძის გაზმომარაგების პროექტის განხორციელება 2018 წლის ივნისში საქართველოს მთავრობამ „საქართველოს ნავთობისა და გაზის კორპორაციას“ დაავალა. ამ პროექტის ფარგლებში დაგეგმილია „ადიგენი-გოდერძის“ 33 კმ სიგრძის გაზსადენის მშენებლობა რომელიც დაერთებული იქნება ადიგენის მუნიციპალიტეტში არსებული „ახალციხე-ვალე-არალის“ გაზსადენზე.

2019 წლის 8 თებერვალს ადიგენის მუნიციპალიტეტის სოფელ წარბასთუბნის რიტუალების შენობაში დაგეგმილია „ადიგენი-გოდერძის“ 33 კმ სიგრძის გაზსადენის მშენებლობის და ექსპლუატაციის პროექტის გზშ-ს ანგარიშის საჯარო განხილვა. პროექტის დოკუმენტაციასთან დაკავშირებული  შენიშვნებისა და მოსაზრებების სამინისტროში წარდგენა კი შესაძლებელია 2019 წლის 28 თებერვლის ჩათვლით.

ამ პროექტის გზშ-ს მიხედვით, „საკურორტო ზონა გოდერძი დღეისათვის არსებული მდგომარეობით მოკლებულია გაზმომარაგებების რაიმე ალტერნატიულ წყაროს და პროექტის განხორციელება საშუალებას იძლევა მოხდეს, როგორც კურორტების გოდერძისა და ბეშუმის, ასევე საქრთველო-თურქეთის საზღვარზე არსებული სასაზღვრო პუნქტის გაზიფიცირება. პროექტის განხორციელება მომავალში საშუალებას იძლევა დაიგეგმოს ხულოს მუნიციპალიტეტის სოფლების გაზიფიცირება, რაც პერსპექტივაში საშუალებას მოგვცემს მოვახდინოთ მაღალმთიანი აჭარის გაზმომარაგების დივერსიფიკაცია“.

„ადიგენი-გოდერძის გაზსადენის ტრასა გადის რთული რელიეფის და გეოგრაფიულ-კლიმატური პირობების ადგილებში, რომელიც ხასიათდება ხანგრძლივი ზამთრით და დიდი თოვლის საფარით. ამის გამო გართულებულია სატრანსპორტო საშუალებებით მისვლის და გაზსადენის ტექნიკური მომსახურების შესაძლებლობა, თუმცა აღნიშნული პროექტის ტრასა შერჩეულია მაქსიმალურად ოპტიმალურ ტერიტორიაზე, რათა მილსადენის ექსპლუატაციის პერიოდში უზრუნველყოფილი იყოს ტექნიკური მომსახურების გაწევა,“ – აღნიშნულია დოკუმენტში.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com