შპს „სანდასუფთავების“ მონაცემებით, 2019 წელს, იანვრის თვეში, ქუჩების დანაგვიანებისთვის ხუთი ჯარიმა დაიწერა – გადაზიდვებისას ტერიტორიის დატალახიანების გამო 1500 ლარით დაჯარიმდა ერთი სამშენებლო კომპანიაა, დანარჩენი ოთხი ჯარიმა კი ფიზიკური პირებზე დაიწერა.
გასულ წელს, მარტიდან დეკემბრის ჩათვლით, სულ 75 საჯარიმო ოქმი დაიწერა, გაიცა 148 წერილობითი და 93 სიტყვიერი გაფრთხილება.
წელს „სანდასუფთავების“ მონიტორინგის და ზედამხედველობის სამსახურის მიერ სამი გაფრთხილება გაიცა.
„ახალი წლის პერიოდი იყო, ამიტომ აქტიური მუშაობა შუა თვიდან დავიწყეთ. ეს პატარა ქალაქია, როცა ერთ ობიექტს აჯარიმებ, სხვაც ხედავენ და ირგვლივ სხვა მაღაზიებიც ცდილობენ, რომ არ დაჯარიმდნენ, არავის უნდა 200 და 500 ლარიანი ჯარიმა“ – ამბობს „სანდასუფთავების“ მონიტორინგის და ზედამხედველობის სამსახურის უფროსი შოთა თოდაძე.
ნარჩენების მართვის კოდექსის 32-ე მუხლის l-ნაწილით “სამშენებლო ნარჩენებით გარემოს დანაგვიანების გამო” ადმინისტრაციული ოქმით მოქალაქე – 200 ლარით, ინდმეწარმე კი – 500 ლარით ჯარიმდება.
________________
ფოტოზე: შპს სანდასუფთავების მიერ ფეისბუქგვერდზე გამოქვეყნებული ფოტომასალის კოლაჟი
