ირაკლი შავაძე ისევ მოსამართლეობას აპირებს და იუსტიციის უმაღლესი საბჭოს გადაწყვეტილებას ელის. მან მოსამართლეობის კონკურსში უკვე მიიღო მონაწილეობა, თუმცა კენჭისყრისთვის საბჭოს წევრებს ჯერ არ მოუცლიათ.
„ჩემი საკითხი პრობლემატურია, ამიტომაც არაფერს გამოვრიცხავ…“ – ეჭვობს ირაკლი შავაძე, რომელსაც მოსამართლეობის უფლებამოსილება 4 იანვრიდან შეუწყდა.
ბათუმის საქალაქო სასამართლოს თავმჯდომარეს, დავით მამისეიშვილს ირაკლი შავაძე გასული წლის თებერვალში დაუპირისპირდა, როცა მას იუსტიციის უმაღლესმა საბჭომ უვადოდ მოსამართლედ გამწესებაზე უარი უთხრა. ირაკლი შავაძე მაშინ სასამართლო სისტემაში კლანურ მმართველობაზე ისაუბრა. „იმიტომ არ დამნიშნეს, რომ არ ვარ კოლექტიური მურუსიძე,“ – ამბობდა ის.
რა შეიცვალა ამჯერად და რატომ მიიღო ირაკლი შავაძემ მოსამართლეობის კონკურსში მონაწილეობა? – „დასაკარგი მაინც არაფერი მაქვს. ახლა უმუშევარი ვარ… ერთხელ თქვენთან ინტერვიუში ვთქვი, რომ სახლში წასვლის არ მეშინია. თუკი იუსტიციის უმაღლესი საბჭო ისევ უარს მეტყვის, მაშინ მოვძებნი სხვა სამსახურს. შესაძლოა, ისევ ადვოკატი გავხდე,“ – გვითხრა ირაკლი შავაძემ.
კონკურსში მონაწილეობის მიღებამდე ირაკლი შავაძემ სარჩელი საკონსტიტუციო სასამართლოში შეიტანა. მის ინტერესებს „ახალგაზრდა იურისტთა ასოციაცია“ დაიცავს. თუკი საკონსტიტუციო სასამართლო ყოფილი მოსამართლის სარჩელს დააკმაყოფილებს, კანდიდატებს ვეღარ ეტყვიან დაუსაბუთებლად უარს მოსამართლის პოზიციის დაკავებაზე.
„გამოვიდა, რომ მე ვაკმაყოფილებდი კანონით განსაზღვრულ კრიტერიუმებს, მაგრამ მაინც არ დამნიშნეს… უზენაესი სასამართლოს საკვალიფიკაციო პალატამაც უარი მითხრა. თუკი საკონსტიტუციო სასამართლო ჩემს სარჩელს დააკმაყოფილებს, გამოვა, რომ იუსტიციის უმაღლესმა საბჭომ კი არ გადაამეტა უფლებამოსილებას, არამედ საკანონმდებლო ნორმა იყო პრობლემური და ამიტომ ვერ მოხდა ჩემი უვადოდ გამწესება,“ – განმარტავს ირაკლი შავაძე.
საკონსტიტუციო სასამართლომ უნდა თქვას, უვადო მოსამართლედ დანიშვნის წესი, რამდენად შეესაბამება კონსტიტუციას, რომელიც ამბობს, რომ სახელმწიფო თანამდებობის დაკავება ნებისმიერს შეუძლია, თუკი ის კანონით გათვალისწინებულ მოთხოვნებს აკმაყოფილებს.
იუსტიციის უმაღლესი საბჭოს კონკურსის შედეგებს ბათუმის საქალაქო სასამართლოს თავმჯდომარე დავით მამისეიშვილი და მოსამართლე თამარ ბეჟანიშვილიც ელოდებიან. დავით მამისეიშვილს თბილისის სააპელაციო სასამართლოში სურს მოსამართლეობა, თამარ ბეჟანიშვილს – ხელვაჩაურის სასამართლოში.
