ზამთრის პერიოდში ღამის თავშესაფარში მყოფ ადამიანებს ადგილზე დარჩენა დღისითაც შეეძლებათ. ამის შესახებ ბათუმის მერმა, ლაშა კომახიძემ, გუშინ, 14 იანვარს, თავშესაფარში სტუმრობის დროს თქვა. მერმა თავშესაფარში მცხოვრებ ადამიანებს საახალწლო ნობათი და ტკბილეული გადასცა.
ბათუმის მერიის თავშესაფარი მხოლოდ ღამის გათევას ითვალისწინებს. ბენეფიციარებმა საუზმის შემდეგ შენობა დილის 10 საათამდე უნდა დატოვონ. თავშესაფარში ამჟამად სულ 50 ადამიანია.
„არ ვიცი, რამდენი გამოთქვამს სურვილს. ნებისმიერს შეუძლია დარჩეს. ამისთვის ცალკე ოთახი გვაქვს გამოყოფილი, სადაც მათ დღის განმავლობაში შეუძლიათ დარჩენა,“ – განმარტავს ასლან გელაძე, ბათუმის მერიის სოციალური სერვისების სააგენტოს უფროსი.
ასლან გელაძის თქმით, ოთახი, სადაც თავშესაფრის ბენეფიციარები დღისით დარჩებიან, კეთილმოწყობილი არ არის. სოციალური სერვისების სააგენტოს უფროსი დახმარებას ბიზნესმენებისგან ელის.
„მთავარია, ამ ოთახში არის გათბობა. ჩვენ გვინდა სკამების შეძენა, ბიზნესმენებს მინდა ეს ვთხოვო. ხაზინა რომ გაიხსნება, შესაძლოა ჩვენ თვითონ შევიძინოთ ეს ავეჯი. მინდა, ტელევიზორიც დავუდგა,“ – გვითხრა ასლან გელაძემ.
თავშესაფარში დღისით დარჩენილ ადამიანებს სადილი არ ერგებათ.
ამავე თემაზე:
რა უნდა გავაკეთოთ, თუ ღამით ბათუმის ქუჩებში მიუსაფარ ადამიანს ვხედავთ
