წვიმის შედეგად ბათუმში რამდენიმე ქუჩა დაიტბორა. ბათუმის მერიის შპს – „ბათუმის წყლის“ ინფორმაციით, გაწმენდისა და ამოტუმბვის სამუშაოები ბაგრატიონისა და თავდადებულის, ასევე, აღმაშენებლისა და ბაგრატიონის ქუჩების კვეთებში ამ წუთებშიც გრძელდება. ადგილზე მობილიზებულია 6 ერთეული ტექნიკა და ფიზიკურად მუშაობს 75 ადამიანი.
ქალაქში გადაადგილების დროს „ბათუმელებმა“ დააფიქსირა, რომ დატბორილია ბესიკისა და 26 მაისის ქუჩების გადაკვეთის ადგილიც.
„ბათუმის წყალში“ გვითხრეს, რომ ამ ქუჩების დატბორვის შესახებ მათთან ინფორმაცია არ შესულა. კომპანიაში ვერ გვითხრეს, რამდენი შეტყობინება შევიდა ამ დროისთვის.
„ბათუმის წყლის“ პრესსამსახურში განმარტეს, რომ ძლიერი წვიმის შედეგად პრობლემა რამდენიმე ქუჩაზე დღის მეორე ნახევრიდან შეიქმნა – მოქალაქეებმა ცხელ ხაზზე 4 საათის შემდეგ დარეკეს.
ჯერჯერობით არ ვრცელდება ინფორმაცია საცხოვრებელ სახლებში წყლის შესვლის შესახებ.
მთავარი ფოტო: დატბორილი 26 მაისის ქუჩა, მანანა ქველიაშვილის ფოტო.
