ნეტგაზეთი • RU

ზამთრის სეზონთან დაკავშირებით მერია საგანგებო რეჟიმში მუშაობისთვის ემზადება

დღეს ბათუმის მერმა ზამთრის სეზონთან დაკავშირებით მერიაში საგანგებო თათბირი გამართა. შეხვედრაზე ითქვა, რომ საჭიროების შემთხვევაში, ბათუმის მერიის სტრუქტურული ერთეულები და მის დაქვემდებარებაში მყოფი ორგანიზაციები ზამთრის სეზონთან დაკავშირებით, უხვი ნალექისა და თოვლის შემთხვევაში, მუშაობის საგანგებო რეჟიმზე გადავლენ.

გასულ წლებში დიდთოვლობის გამო, გარკვეული პერიოდით ბათუმის ქუჩებში ტრანსპორტით გადაადგილება ფაქტობრივად შეუძლებელი იყო. თოვლის გამო დაზიანდა სადენებიც და მცენარეებიც. დღეს, 22 ნოემბერს, მოსული უხვი ნალექის გამო ბათუმში უკვე დაიტბორა რამდენიმე ქუჩა. როგორც შეხვედრაზე ითქვა, ასეთი ვითარების თავიდან ასაცილებლად ტექნიკა, რომელიც საჭიროა ქალაქის გასუფთავებისთვის, გამართულია, მობილიზებულია სამუშაო ჯგუფი, რომელიც ფიზიკურად მუშაობს თოვლის საფარის გაწმენდისთვის. ასევე, შეძენილია ქალაქის ტერიტორიებისა და ცხაურების თოვლის საფარისგან გასაწმენდად ყველა საჭირო ხელსაწყო და ინსტრუმენტი.

შეხვედრას საგანგებო სიტუაციების მართვის სამსახურის, „ენერგო-პრო ჯორჯიას“, „სოკარ ჯორჯია გაზისა“ და „სილქნეტის“ წარმომადგენლებიც ესწრებოდნენ.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან