ეროვნული სატყეო სააგენტოს ინფორმაციით, ბათუმის უნივერსიტეტის სტუდენტები ბორჯომის ნახანძრალ ტყეში ნაძვისა და ფიჭვის ნერგებს ვერ დარგავენ. მათ ნერგების დარგვის უფლება ბორჯომის პლატოზე მიეცემათ.
როგორც სააგენტოში „ბათუმელებს“ უთხრეს, ნახანძრალ ტყეში ხეების დარგვა სპეციალისტებთან შეთანხმების გარეშე არ შეიძლება. არც ფიჭვისა და მუხის ნერგების დარგვაა ამ ზონაში შესაძლებელი, რადგან ბორჯომის ტყეში მხოლოდ შავი ფიჭვი და კავკასიური სოჭი ირგვება“, – გვითხრეს სააგენტოში.
ბათუმის რუსთაველის უნივერსიტეტის სტუდენტები ბორჯომის ნახანძრალ ტყეში 800-მდე ნერგის დარგვას რომ აპირებდნენ, ამის შესახებ „ბათუმელებს“ უნივერსიტეტის ადმინისტრაციამ უთხრა.
„ნახანძრალ ტერიტორიაზე აღდგენით სამუშაოებს მხოლოდ მკაცრად განსაზღვრული პროექტის მიხედვით ვახორციელებთ, მეტყევეების ზედამხედველობის ქვეშ. რადგან უნივერსიტეტს თავისი ძალებით ჰქონდა გამოყვანილი ნერგების გარკვეული სახეობა და რაოდენობა, ჩვენ შევთავაზეთ ბორჯომის პლატოს ტერიტორია, რადგან ესეც არის ერთგვარი ცხელი წერტილი – მავნებლებით არის ეს ტერიტორია დაზიანებული და იქ სანიტარული ჭრები განვახორციელეთ, ახლა მიდის აღდგენის პროექტი. ზუსტად ის სახეობები აქვს უნივერსიტეტს, რაც ამ ტყისთვის ისედაც ვრგავთ“, – გვეუბნება ნათია იორდანიშვილი, ეროვნული სატყეო სააგენტოს უფროსის მოადგილე.
მისი თქმით, სტუდენტებს მიიწვევენ ნახანძრალ ტერიტორიაზეც, რომ ადგილზე გაეცნონ სამუშაოებს და სიმბოლურად, სააგენტოს ნებართვით იქაც დარგავენ სტანდარტულ ნერგს.
იორდანიშვილის თქმით, ბორჯომის ნახანძრალ ტყეში ირგვება როგორც ფიჭვი, ასევე ფოთლოვანი ხე-მცენარეები იმისათის, რომ მომავალში ნაძვი და სოჭი დაირგოს აღდგენილ ტერიტორიაზე და აღდგეს ხანძრამდე არსებული ეკოსისტემა.
