კამპანიამ „თანასწორობა გვჭირდება“ რეგიონული ტურნეს ფარგლებში ბათუმში პერფორმანსი მოაწყო. დღეს, 17 ოქტომბერს, მთელი დღის მანძილზე, ნებისმიერ დაინტერსებულ პირს შეუძლია მივიდეს თავისუფალი ხელოვნების სივრცეში და იქ წარმოდგენილი ინსტალაცია ნახოს. საღამოს 6 საათზე კი დისკუსიას დაესწროს.
„აქ იმიტომ ვარ რომ მინდოდა მეტი ადამიანისთვის მომეყოლა იმ რეალური ბარიერების შესახებ, რომელიც ქალს დღეს აქვს საზოგადოებაში, თუნდაც საკუთრების არ ფლობის გამო. მე არ მქონდა საკუთრება, ამიტომ ვერ მოვახერხე საკუთარი საქმის განვითარება,“ – უთხრა „ბათუმელებს“ ციცინო შენგელიამ. ის კამპანიის ერთ-ერთი მონაწილე ქალია.
სტატისტიკის თანახმად ქალთა 35% საქართველოში, არ ფლობს საკუთრებას. საკუთრების არ ქონა კი მათ ბევრ რამეში უშლით ხელს. მაგალითად, არ შეუძლიათ ბანკიდან სესხის აღება და ამ გზით საკუთარი ბიზნესის განვითარება.
„ამ კამპანიის მიზანი, ქალთა ეკონომიკური მდგომარეობის გაძლიერებაა, საზოგადოების ცნობიერების ამაღლება იმ პრობლემების შესახებ, რასაც ქალები აწყდებიან ეკონომიკური საქმიანობის დაწყების წინ. ჩვენ ვსაუბრობთ ისეთ თემებზე როგორიცაა სექსუალური შევიწროება, ქალისა და მამაკაცის ხელფასებს შორის უთანასწორობა, რესურსებზე და სერვისებზე ხელმისაწვდომობა. ქალების დიდი ნაწილი ვერ არის ჩართული ეკონომიკურ საქმიანობაში ამ და ბევრ სხვა მიზეზთა გამო,“ – ამბობს მაკა მეშველიანი, გაეროს განვითარების პროგრამის წარმომადგენელი.
პერფორმანსი ინტერაქტიულია. მისული დამთვალიერებელი თავად ხდება ისტორიის ნაწილი. საკუთარ ისტორიაზე, სამუშაო ადგილას სექსუალურ შევიწროებაზე და საჯარო აღიარების შემდგომ პრობლემებზე ისაუბრა თათია სამხარაძემ. მისი თქმით, ის რაც დღეს ქალებს სჭირდებათ, არის კანონი სექსუალური შევიწროების შესახებ.
კამპანიის „თანასწორობა გვჭირდება“ მიზანი ქალების ეკონომიკური გაძლიერების ხელშემშლელი ბარიერებისა და არსებული გამოწვევების შესახებ დისკუსიების გენერირებაა.
საქართველოში ქალების ეკონომიკური გაძლიერების ბარიერებსა და მათი მოგვარების პოლიტიკურ ხედვებზე დღესვე, 18:00 საათზე დისკუსია გაიმართება. დასწრება თავისუფალია.
