Batumelebi | 4 ოქტომბერს ბათუმის რუსთაველის უნივერსიტეტში დათო ტურაშვილთან შეხვედრა გაიმართება 4 ოქტომბერს ბათუმის რუსთაველის უნივერსიტეტში დათო ტურაშვილთან შეხვედრა გაიმართება – Batumelebi

4 ოქტომბერს ბათუმის რუსთაველის უნივერსიტეტში დათო ტურაშვილთან შეხვედრა გაიმართება

ბათუმის შოთა რუსთაველის სახელმწიფო უნივერსიტეტის ცნობით, 4 ოქტომბერს, 13:00 საათზე, უნივერსიტეტის 328-ე აუდიტორიაში გაიმართება მწერალ დათო ტურაშვილის შეხვედრა სტუდენტებთან.

შეხვედრა ტარდება ლიტერატურული კონკურსის – „შემოდგომის ლეგენდა“ – ფარგლებში, რომელიც თბილისის სახელმწიფო უნივერსიტეტისა და კომპანია „ჯეოსელის“ ერთობლივი პროექტია.

კონკურსში საქართველოს მასშტაბით სხვადასხვა რეგიონის უმაღლესი სასწავლებლის სტუდენტები ჩაერთვებიან. კონკურსში სამივე საგანმანათლებლო საფეხურის სტუდენტები მონაწილეობენ.

კონკურსი სამ ეტაპად გაიმართება. პირველ ეტაპზე მონაწილეობის მსურველებმა 14 ოქტომბრის ჩათვლით, კონკურსის ელფოსტაზე – shemodgomis-legenda@tsu.ge უნდა გაგზავნონ: პროზაული ნაშრომი – მოთხრობა ან ნოველა [შესაძლებელია ნაწყვეტი ვრცელი ტექსტიდან] ნაბეჭდი სახით, არანაკლებ ერთი და არაუმეტეს სამი თაბახის გვერდისა; ჟანრი და თემა შეუზღუდავია [შრიფტი – Sylfaen, ზომა – 11] და შევსებული ანკეტა, რომელიც თბილისის სახელმწიფო უნივერსიტეტის ოფიციალურ ვებგვერდზეა განთავსებული.

უნივერსიტეტის ჟიური შიდაშესარჩევ ტურში გამოავლენს 10 ფინალისტს, რომლებიც მეორე ტურში გადაინაცვლებენ და მთავარი კონკურსის – იმპროვიზაციული ტურის მონაწილეები გახდებიან.

კონკურსის ფინალური ტური წინანდალში, ჭავჭავაძეების სახლ-მუზეუმში გაიმართება.

თბილისის სახელმწიფო უნივერსიტეტის ფულად პრემიას და კომპანია „ჯეოსელის“ პრიზებს გამარჯვებული სამეული მიიღებს: I ადგილი – 1000 ლარი და კონკურსის სიმბოლო; II ადგილი – 700 ლარი; III ადგილი – 500 ლარი.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.