შპს „სტადიონმა“, რომელიც ბათუმში საფეხბურთო სტადიონის მშენებლობას კურირებს, სამშენებლო სამუშაოების ტექნიკური ზედამხედველი შეარჩია. სატენდერო კომისიამ შპს „სიემსი“ ხელშეკრულების გასაფორმებლად მიიწვია, თუმცა მანამდე კომისიაში დამატებით, საბანკო გარანტიის წარდგენა მოსთხოვა. კომპანიას ვადა 2018 წლის 2 ოქტომბრამდე ჰქონდა. კომპანიამ საბანკო გარანტია გუშინ, 27 სექტემბერს წარადგინა. ხელშეკრულება ტენდერების გვერდზე ატვირთული ჯერ არ არის.
20 ათას მაყურებელზე გათვლილი სტადიონის მშენებლობა ბათუმში მეცხრე თვეა ტექნიკური ზედამხედველი კომპანიის გარეშე მიმდინარეობს.
სტადიონის სამშენებლო სამუშაოების ტექნიკურ ზედამხედველობაზე ბოლო ტენდერი 2018 წლის 5 ივლისს გამოცხადდა და 26 ივლისს დასრულდა. ტენდერში სამი კომპანია მონაწილეობდა. მათგან ერთ-ერთს, რომელიც ყველაზე დაბალ ფასად სთავაზობდა „სტადიონს“ მომსახურებას, ტენდერიდან დისკვალიფიკაცია მისცეს.
მომდევნო პრეტენდენტი, რომელსაც ყველაზე დაბალი ფასი ჰქონდა დაფიქსირებული, იყო სწორედ „სიემსი“, რომელიც მესამე პრეტენდენტთან შედარებით 3 ლარით იაფად სთავაზობს ტექნიკურ ზედამხედველობას „სტადიონს“.
ტენდერში [სატენდერო თანხა: 2 437 431 ლარი] პრეტენდენტთა საბოლოო შეთავაზებები იყო: „კოლიერს ინტერნეიშენალ ჯორჯია“ – 1 970 256 ლარი; „სიემსი“ – 2 388 580 ლარი და „ოიკო ჯგუფი“ – 2 388 583 ლარი. ტენდერში შესყიდვის სავარაუდო ღირებულება კი, 2 437 431 ლარი იყო.
მთავარი ფოტო: მშენებარე სტადიონი ბათუმში / „ბათუმელების“ არქივიდან
