ამერიკული და იტალიური საწვრთნელი გემები ბათუმის ნავსადგურში [ფოტო]

დღეს, 23 აგვისტოს, ბათუმის პორტში იტალიური სამხედრო-საზღვაო ფლოტის სასწავლო-საწვრთნელი გემი “Palinuro” და ამერიკული მართვადი სარაკეტო გემი “Carney”(DDG 64) შემოვიდნენ.

ამერიკული გემი “Carney” (DDG 64), ბათუმში 23-25 აგვისტოს დარჩება. ‘Carney’ Arleigh Burke-ს კლასის მართვადი სარაკეტო გამანადგურებელია და ამერიკის შეერთებული შტატების საზღვაო მე-6 ფლოტს ეკუთვნის. საქართველოში ყოფნისას USS Carney განახორციელებს რუტინულ კომბინირებულ ტრენინგს საქართველოს სანაპირო დაცვასთან ერთად და ასევე გეგმავს შერჩეული ჯგუფებისთვის გემის ტურების მოწყობას. USS Carney-ს, რომელიც ექსპლუატაციაშია როტაში, ესპანეთში, აშშ-ის მე-6 ფლოტის ოპერაციებში მრავალრიცხოვან მისიას ასრულებს რეგიონული საზღვაო უსაფრთხოების უზრუნველყოფისთვის. ის ასრულებს ორმხრივი და მრავალმხრივი ტრენინგ-მისიებს და მხარს უჭერს ნატო-ს ოპერაციებს შავი ზღვის რეგიონის მასშტაბით.

საელჩოს ინფორმაციით, USS Carney-ს ვიზიტი კიდევ ერთხელ ადასტურებს ამერიკის შეერთებული შტატების ვალდებულებას, გააძლიეროს ურთიერთობა ნატო-ს ისეთ მოკავშირესთან და პარტნიორთან, როგორიც საქართველოა და ხელი შეუწყოს ორმხრივ მიზნებზე მუშაობას შავი ზღვის რეგიონის უსაფრთხოებისა და სტაბილურობისთვის.

აშშ-ის საზღვაო ძალებს გემები შემოჰყავთ შავ ზღვაში მონტერექსის კონვენციისა და საერთაშორისო სამართლის შესაბამისად.

USS Carney

რაც შეეხება იტალიურ გემს “Palinuro”, იგი ბათუმის პორტში 26 აგვისტომდე გაჩერდება. “Palinuro” ჩართულია 54-ე საწვრთნელ კამპანიაში და ამჟამად მასზე სწავლებას გადის ტარანტოს საზღვაო უნტერ-ოფიცერთა სკოლის კურსის “Kratos”-ის 33 კურსანტი, რომლებიც შეისწავლიან საზღვაო-სანაოსნო მეცნიერებებს და იძენენ უშუალო გამოცდილებასა და საზღვაო სფეროს სპეციალისტების შემდგომი დასაქმებისათვის აუცილებელ და სათანადო პროფესიულ ჩვევებს.

გემი ტარანტოს პორტიდან 23 ივლისს გამოვიდა და კოსის, სტამბულისა და კოსტანცას ნავსადგურებში გაჩერების შემდეგ, შემოვა ბათუმში, საიდანაც გაემგზავრება კეფალონიაზე და ამის შემდეგ დაბრუნდება იტალიაში, ჯერ რეჯო კალაბრიაში, შემდგომ კი ლივორნოში, სადაც დასრულდება კურსანტების საწრთვნელი კამპანია.