„მეტრო სითი ლეჯენდ ბათუმს“ უნებართვოდ აშენებული ბენზინგასამართი სადგური დაანგრევინეს

ბათუმში, ზღვასთან ახლოს, სასტუმრო „ეიფორიას“ მიმდებარე ტერიტორიაზე, კომპანია „მეტრო სითი ლეჯენდ ბათუმმა“ ბენზინგასამართი სადგური უნებართვოდ ააშენა. კომპანია ბათუმის მერიის ზედამხედველობის განყოფილებამ რამდენჯერმე გააფრთხილა, დააჯარიმა და საქმე აღსრულებას გადასცა.

ზედამხედველობის ამავე განყოფილების უფროსის, ირაკლი მოქიას ინფორმაციით, კონსულტაციების შემდეგ კომპანიამ დემონტაჟი თავად განახორციელა. მოქიას თქმით, მოლაპარაკებებში მერიის გარდა აჭარის მთავრობაც ჩაერთო.

ბათუმში ხშირია უნებართვო მშენებლობები, თუმცა უკანონოდ აშენებული შენობის დემონტაჟის შემთხვევა ამ დრომდე არავის ახსენდება. საქმეები ძირითადად აღსრულებაში გადადის, აღსრულება კი ვერ ხორციელდება იმ მიზეზით, რომ სააღსრულებო ბიუროს, როგორც თავად განმარტავს, შესაბამისი რესურსი არ გააჩნია.

კომპანია „მეტრო სითი ლეჯენდ ბათუმი“ 2017 წელს დააფუძნეს. კომპანიას შპს „მეტროს“ პარტნიორები ფლობენ, კომპანიის ერთ-ერთი დირექტორი „მეტროს“ დირექტორი, რაულ კახაძეა.

ფოტო: ბათუმის მერიის ზედამხედველობის განყოფილება