ნეტგაზეთი • RU

ბათუმის მერიამ შესაძლოა მშენებლობის მსურველისგან საბანკო გარანტია მოითხოვოს

ბათუმის ტერიტორიაზე მრავალბინიან საცხოვრებელ სახლებზე არსებული დაუსრულებელი მიშენება-დაშენებების პრობლემის მოგვარებას კანონის შეცვლა სჭირდება. ასე ქალაქის მერიაში ფიქრობენ. მერიის ინფორმაციით, ასეთი დაუსრულებელი მშენებლობები ქალაქში წლების განმავლობაში დაგროვდა და ქალაქის იერსახეს აზიანებს.

„მიუხედავად იმისა, რომ მუნიციპალური რეგულაციებით მრავალბინიან საცხოვრებელ სახლებზე მიშენება-დაშენება შესაძლებელია მხოლოდ ერთიანი პროექტის მიხედვით, მშენებლობის ნებართვის გაცემის შემდგომ იწყება მშენებლობა, თუმცა საბოლოო სახეს ვერ ღებულობს იმის გამო, რომ ზოგიერთი ბინათმესაკუთრე არ არის დაინტერესებული მოცემული მშენებლობით (მიშენებით ან დაშენებით). საბოლოო ჯამში აღნიშნულით ვღებულობთ ქალაქის იერსახისათვის შეუფერებელ შენობა-ნაგებობებს“, – ნათქვამია დოკუმენტში, რომელიც მერიამ განსახილველად აჭარის უმაღლეს საბჭოს გადაუგზავნა.

მერიაში მიიჩნევენ, რომ შესაბამის საკანონმდებლო ნორმატიული აქტის შეცვლა მერს მისცემს საშუალებას მშენებლობით დაინტერესებულ პირს მშენებლობის ნებართვის ასაღებად მოსთხოვოს მშენებლობისთვის საჭირო თანხის საბანკო გარანტიის წარმოდგენა. დამკვეთის მიერ სანებართვო პირობების შეუსრულებლობის შემთხვევაში, ეს მუნიციპალიტეტს მისცემს უფლებას და შესაძლებლობას თავად უზრუნველყოს მშენებლობის დასრულება შეთანხმებული პროექტის შესაბამისად.

კითხვაზე, რატომ განიხილავს  მერია ასეთ შესაძლებლობას მხოლოდ მიშენება-დაშენების შემთხვევაში და არა ახალი პროექტის შეთანხმებისას, მითუმეტეს, რომ ბათუმში დაწყებული ბევრი მშენებლობის დასრულება ინვესტორებმა ვერ შეძლეს და მათ შორის რამდენიმე ქალაქის ცენტრალურ ნაწილშიც კი წლებია მიტოვებულია, მერიაში გვიპასუხეს, რომ ამ მიმართულებით მერია სხვა ინიციატივაზე მუშობს.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი