სარფის სასაზღვრო გამშვებ პუნქტთან ახლოს, თურქეთის საბაჟოს მიმდებარე ტერიტორიაზე, მეწყრის შედეგად კლდის ნაწილი ჩამოიშალა. საქართველოს შინაგან საქმეთა სამინისტროს განცხადებით, ამის გამო სარფი-ტრაპიზონის დამაკავშირებელი მაგისტრალი დროებით დაკეტილია.
“უსაფრთხოების ზომებიდან გამომდინარე, თურქეთის თხოვნით, ორი ქვეყნის შესაბამისი უწყებების გადაწყვეტილებით, საქართველო-თურქეთის სახელმწიფო საზღვარზე („სარფის“ მონაკვეთზე) დროებით შეიზღუდა როგორც სატრანსპორტო საშუალებების, ასევე ქვეითთა გადაადგილება. დამეწყრილ ტერიტორიაზე გზის სავალი ნაწილის გაწმენდის შემდეგ, მოძრაობა აღდგება და სახელმწიფო საზღვარზე გადაადგილება ჩვეულ რეჟიმს დაუბრუნდება,” – ნათქვამია შსს-ს განცხადებაში.
“ბათუმელებმა” დეტალების გადასამოწმებლად ბათუმში თურქეთის გენერალურ საკონსულოს მიმართა.
“პორტში მიმდინარეობს სამუშაოები და ამ სამუშაოებისთვის პერიოდულად კლდეს აფეთქებენ და გადააქვთ მასალები. სწორედ ერთ-ერთი ასეთი აფეთქების დროს ჩამოიშალა კლდის მასა და ჩაიხერგა გზა, რომელიც დაახლოებით ორ-სამ საათში გაიხსნება,” – უთხრეს “ბათუმელებს” საკონსულოში.
საკონსულოს ინფორმაციით, საზღვართან ახლოს იყო დაკვამლიანებაც. „ეს გამომდინარე იქედან, რომ გარკვეულ მონაკვეთზე ნაგავს წვავდნენ“, – განმარტეს საკონსულოში.
ფოტო: თურქეთის გენერალური საკონსულო ბათუმში
