„2017 წელს ბათუმისა და ქობულეთის პიკურმა დატვირთვამ 117 მგვტ/სთ-ს გადააჭარბა, რაც 2016 წლის ანალოგიურ მაჩვენებელთან შედარებით 20%-ზე მეტია. მნიშვნელოვნად გაზრდილია ახალი მიერთებების რაოდენობაც, რამაც გაზარდა ელექტროენერგიაზე მოთხოვნა,“ – ინფორმაციას ამის შესახებ „ენერგო-პრო ჯორჯია“ ავრცელებს.
ენერგოკომპანიის განცხადებით, იმისთვის, რომ გაზრდილი მოთხოვნის დაკმაყოფილება მოხერხდეს, მაღალი ძაბვის გადამცემი ხაზი „ერგე 1“-ის არსებული ტექნიკური მდგომარეობა უნდა გამოსწორდეს. ხაზის სარეკონსტრუქციო სამუშაოებისათვის „ენერგო-პრო ჯორჯია“ პირველ ეტაპზე რამდენიმე მილიონ ლარს დახარჯავს.
„ერგე 1“ სს „ენერგო-პრო ჯორჯიას“ საკუთრებაა. ენერგოკომპანიაში აცხადებენ, რომ რეაბილიტაცია-რეკონსტრუქციის დროს ახალი ანძების მონტაჟი იმავე მიწის ნაკვეთებზე განხორციელდება, რომელზეც ძველი დგას.
„ერგე 1“ მე-20 საუკუნის 30-იან წლებშია აშენებული და მას კაპიტალური რეკონსტრუქცია-რეაბილიტაცია სჭირდება. ვარაუდობენ, რომ რეაბილიტაციის შემდეგ ხაზის გამტარუნარიანობა მინიმუმ 2-ჯერ გაიზრდება.
