შავ ზღვაში მესამე საზღვაო ექსპედიცია დასრულდა – კვლევის შედეგები თვის ბოლომდე გამოქვეყნდება


გარემოს ეროვნული სააგენტოს მეთევზეობისა და შავი ზღვის მონიტორინგის დეპარტამენტმა მესამე საზღვაო ექსპედიცია დაასრულა.

თევზჭერა საქართველოს შავი ზღვის სანაპიროს სხვადასხვა უბანზე, ყველა აქტიურ სიღრმით იარუსზე – თევზსაჭერი ბადის გამოყენებით განხორციელდა.  სპეციალური ხელსაწყოების საშუალებით მოხდა არსებული რესურსების სკანირება.

ფოტო: გარემოს ეროვნული სააგენტო

სპეციალისტების მიერ საქართველოს ტერიტორიაზე, შავ ზღვაში თევზების ბიომრავალფეროვნებისა და მარაგების შესახებ  ინფორმაცია დამუშავდა. ასევე, დააკვირდნენ ზღვის ძუძუმწოვრებს. მეთევზეობისა და შავი ზღვის მონიტორინგის დეპარტამენტის მიერ აღებული მასალა და სინჯების დამუშავება უახლოეს პერიოდში დასრულდება.

ფოტო: გარემოს ეროვნული სააგენტო

გარემოს ეროვნული სააგენტოს მეთევზეობისა და შავი ზღვის მონიტორინგის დეპარტამენტმა, ევროკავშირის წყლის ჩარჩო დირექტივის და საზღვაო სტრატეგიის ჩარჩო დირექტივის მოთხოვნების შესაბამისად, სანაპიროს ბიოლოგიური მონიტორონგი დაიწყო. მონიტორინგი წელს პილოტური ხასიათისაა, 2019 წლიდან კი კვლევა ჩვეულებრივ რეჟიმში გაგრძელდება.

ბიოლოგიური მონიტორინგი მოიცავს ყველა ჰიდრობიოლოგიური ფრაქციის ანუ ზღვაში არსებული ბაქტერიების, წყალში არსებული მცენარეებისა და ზოოპლანქტონის გამოკვლევას.

ფოტო: გარემოს ეროვნული სააგენტო

საქართველოს შავი ზღვის სანაპიროს გარემოსდაცვითი სტატუსის პირველი ბიულეტენი აპრილში მომზადდება.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან