22 მარტს წყლის მსოფლიო დღე აღინიშნება. ამ დღის მიზანია მოსახლეობის ყურადღება გაამახვილოს წყალზე, როგორც პლანეტის ერთ-ერთ უმნიშვნელოვანეს ბუნებრივ რესურსზე. წყლის მსოფლიო დღის კამპანიის ოფიციალურ ვებგვერდზე წერია, რომ დღეს 2 მილიარდამდე ადამიანი ცხოვრობს პოტენციურ მცირეწყლოვან რაიონებში, 2050 წლისთვის კი ეს რიცხვი შესაძლოა 3 მილიარდამდე გაიზარდოს.
წყლის საერთაშორისო დღის წლევანდელი თემაა „ბუნება წყლისთვის“, რომელიც 21-ე საუკუნეში, წყალთან დაკავშირებულ გამოწვევებთან გასამკლავებლად, გამოსავალს ისევ ბუნებაში ეძებს.
მაგალითად, წყლის რესურსის დაზოგვის ბუნებრივი გამოსავალი იპოვა ჩინეთის ხელისუფლებამ, როცა „ღრუბელი ქალაქის“ (Sponge City) ინიციატივა წარმოადგინა. პროექტის მიზანია წვიმის წყლის 70% შეაგროვოს და ხელმეორედ გამოყენოს ქალაქის გამწმენდი და სადრენაჟე სისტემებისთვის გვალვების პერიოდში. როგორც წყლის მსოფლიო დღის კამპანიის ოფიციალური ვებგვერდი იუწყება, 2020 წლისთვის პროექტში ჩინეთის 16 საპილოტე ქალაქი ჩაერთვება.
კიდევ რა იგულისხმება წყლის რესურსის დაზოგვისა და ეფექტურად გამოყენების ბუნებრივი გზებში? – ტყეების, საძოვრებისა და ბუნებრივი ჭაობების აღდგენა, მდინარეების დაკავშირება ჭალებთან, წყლის კალაპოტის გასწვრივ მცენარეული საფარის შექმნა და სხვა, ასეთი გზები ეხმარება წყლის რესურსზე ხელმისაწვდომობისა და წყლის ხარისხის მართვას.
ბათუმში წყალი 78 536 აბონენტს, მდინარე ჩაქვისა და ჩაისუბნის სათავე ნაგებობებიდან მიეწოდება.
