პეტროზავოდსკის საქალაქო ადმინისტრაციას ამ დრომდე არ შეუცვლია ინფორმაცია პუტინის ფონდის მიერ ორგანიზებული კონცერტების შესახებ. დღეს, 14 მარტს პეტროზავოდსკის საქალაქო ადმინისტრაციის ინტერნეტ გვერდზე ისევ წერია, რომ ღონისძიების ერთ-ერთი პარტნიორია ქალაქ ბათუმის მერია.
საუბარია კონცერტზე, სადაც მონაწილეობას გეგმავდა ბათუმის მერიის ქალთა ვოკალური ანსამბლი და ბათუმის მეგობრობის სახლი. 7 მარტს გავრცელებული ეს ინფორმაცია ბათუმის მერიამ თავდაპირველად უარყო, თუმცა იმავე დღეს დადასტურდა, რომ ინფორმაცია ზუსტია.
წერილი ინფორმაციის ჩასწორებაზე ბათუმის მერიამ პეტროზავოდსკის საქალაქო ადმინისტრაციას 9 მარტს გაუგზავნა. მერიამ წერილში ჩაწერა, რომ ის ღონისძიების პარტნიორი არ არის და არც ინფორმაცია ჰქონდა კონცერტის შესახებ.
დღეს ბათუმის მერიის პრესსამსახურში განაცხადეს, რომ მათ პასუხი პეტროზავოდსკიდან არ მიუღიათ და ამ დრომდე ტელეფონით კომუნიკაციაც ვერ მოხერხდა.