რატომ არ განიხილა ნოემბრიდან დღემდე ჯანდაცვის სამინისტროს პროფესიული განვითარების საბჭომ თემურ გაბაიძის გარდაცვალების საქმეში ექიმების პასუხისმგებლობის საკითხი? – ეს შეკითხვა „ბათუმელებმა“ ჯანადაცვის მინისტრს, დავით სერგეენკოს დაუსვა.
თემურ გაბაიძე, აჭარის ფინანსთა და ეკონომიკის მინისტრის ყოფილი მოადგილე, გასულ წელს კურორტ გოდერძიზე მიყენებული დაზიანების შედეგად გარდაიცვალა. სამედიცინო საქმიანობის რეგულირების სააგენტომ ჯანდაცვის სამინისტროს პროფესიული განვითარების საბჭოს სამი ექიმის [შპს „ემერჯენსი სერვისის“ ექიმი, ხათუნა გელაშვილი, შპს „უნიმედი აჭარას“ ბათუმის რეფერალური საავადმყოფოს ექიმები: გიორგი კავთელაძე და მაია მამისაიშვილი] პროფესიული პასუხისმგებლობის თაობაზე მიმართა.
„ყველაზე ცოტა, მინიმალური ვადა, რაც სჭირდება სამინისტროს შესწავლისთვის, არის თვე-ნახევარი. ყოფილა რთული შემთხვევები, როდესაც ამას დასჭირვებია ორი წელი ან მეტი. ჩვენ ამ ეტაპზე ვართ უკვე ფინალიზაციისკენ და ვფიქრობთ, რომ უკვე ძალიან მალე სრული სურათი გვეცოდინება,“ – გვიპასუხა დავით სერგეენკომ. მას ვუთხარით, რომ სამედიცინო რეგულირების სააგენტოს დასკვნა ამ შემთხვევაში უკვე არსებობს.
დავით სერგეენკო: „სამედიცინო რეგულირების სააგენტო არის ჯანდაცვის სამინისტროს ნაწილი. როცა ჯანდაცვის მინისტრი გაძლევთ პასუხს, ის მოიცავს რეგულირების სააგენტოს ეტაპს. მათ სრულად შეისწავლეს საკითხი, რაც მოიცავდა სამედიცინო დოკუმენტაციის დეტალურ შესწავლას და ყველა იმ სამედიცინო პერსონალის, რომელიც მონაწილეობდა ამ პაციენტის მართვაში, დაწვრილებით გამოკითხვაში, ასევე ამ გამოკითხვის დაოქმებაში. ამის შემდეგი ეტაპია ის, რომ პროფესიული ასოციაციები განიხილავენ საკითხს ამ დოკუმენტაციის საფუძველზე და უკვე ვსხდებით ერთად პროფესიული განვითარების საბჭოს ფორმატში, რომლის თავმჯდომარეც მე გახლავართ და გამოგვაქვს უკვე გადაწყვეტილება.“
