Batumelebi | ბრალდებული სასამართლო პროცესზე არ გამოცხადდა ბრალდებული სასამართლო პროცესზე არ გამოცხადდა – Batumelebi
RU | GE  

ბრალდებული სასამართლო პროცესზე არ გამოცხადდა

 

მოსამართლე თამარ ბეჟანიშვილი ქურდობაში ბრალდებულის სისხლის სამართლის საქმეს განიხილავს. ბრალდებული პატიმრობიდან გირაოს საფუძველზეა გათავისუფლებული და ის უკვე მეორედ არ გამოცხადდა სასამართლო პროცესზე. როგორც მისმა ადვოკატმა, ბიძინა ბერიძემ მოსამართლეს უთხრა, სწორედ იმ დღეს, როცა სასამართლო პროცესი იყო ჩანიშნული, მისი დაცვის ქვეშ მყოფი ცუდად გახდა, გამოიძახეს სასწრაფო სამედიცინო დახმარების ბრიგადა და ექიმებმა გადაიყვანეს რეფერალურ საავადმყოფოში. ამის დამადასტურებელი დოკუმენტი ადვოკატმა მოსამართლეს წარუდგინა კიდეც. 

მოსამართლე ბეჟანიშვილმა თქვა, რომ საეჭვოა, როცა უკვე მეორედ, სწორედ იმ დღეს, როცა სასამართლო პროცესია ჩანიშნული, ბრალდებულს სჭირდება ექიმების დახმარება „ჰაერის უკმარისობის გამო“: „ეჭვქვეშ არ ვაყენებ ამ ცნობას, მაგრამ უფრო ნათელი სურათი რომ გვქონდეს, შემდეგ სასამართლო პროცესზე იქნებ წარმოადგინოთ ბრალდებულის სამედიცინო ცნობა საავადმყოფოდან“.

ადვოკატმა თქვა, რომ ჯანმრთელობის შესახებ ინფორმაციას საავადმყოფოდან სასამართლოს მომდევნო სხდომაზე მიიტანს.

ბრალდებულის გამოუცხადებლობის გამო სასამართლო პროცესი 7 ოქტომბრისთვის გადაიდო. ადვოკატის შუამდგომლობას პროკურორი დავით კირჩხელიც დაეთანხმა.

ნეტგაზეთის მასალების სხვა გამოცემებში გადაბეჭდვის წესი
" ბათუმელები"