ნეტგაზეთი • RU

მოძრაობის ახალი სქემა: მერია ტრაილერებისთვის მიმართულების მაჩვენებელს დაამონტაჟებს

გოგოლისა და ნონეშვილის ქუჩების კვეთაში, მერიის საგზაო მოძრაობისა და რეგულირების სამსახური მიმართულების წინასწარ მაჩვენებელს დაამონტაჟებს. იმის გამო, რომ ამ კვეთაში არ დგას შესაბამისი მაჩვენებელი, თბილისისკენ მიმავალი სატვირთო ავტომანქანები შეცდომით გოროდოკის დასახლებისკენ მიდიან. ასე საერთაშორისო გადაზიდვების ტრაილერები ხვდებიან ჩიხში და შემდეგ დიდი ძალისხმევა სჭირდებათ აქედან გასასვლელად. ქუჩის გარკვეულ მონაკვეთებში გარე განათებაც გამორთულია, შესაბამისად, ბნელა.

ბათუმში ავტოტრანსპორტის მოძრაობის ახალი სქემა 17 თებერვლიდან ამოქმედდა. 

“ამ საკითხის შესახებ ინფორმირებული ვართ, გამოსწორდება დაახლოებით 40 წუთში. აქ თბილისის მიმართულების ნიშანი არის საჭირო და ნიშანს დავაყენებთ”, – ამბობს ბათუმის მერიის საგზაო მოძრაობის და რეგულირების სამსახურის უფროსი, ირაკლი თოდუა.

ესტაკადის მშენებლობის გამო ავტოტრანსპორტის მოძრაობის ახალი სქემის შესახებ ცოტა ხნის წინ ქალაქის მერმაც ისაუბრა და თქვა, რომ გარკვეული სამუშაოები ახალი საგზაო ნიშნების დამონტაჟების კუთხითაც ჩატარდება.

“ესტაკადის მშენებლობამ მნიშვნელოვნად შეცვლა არსებული სატრანსპორტო მოძრაობის სქემა. ინფორმირებულობის თვალსაზრისით ვაკეთებთ ყველაფერს ტელევიზიითაც და ფეისბუქითაც. შავშეთის, მაიაკოვსკისა და წერეთლის კვანძი, ასევე გოგოლის ქუჩა, კონტროლდება ჩვენი თანამშრომლების მეშვეობით, ცოცხალ რეჟიმში. საპატრულო პოლიციასთან ვმუშაობთ კოორდინირებულად, რითაც ვცდილობთ ეს პროცესები მაქსიმალურად შევამსუბუქოთ, რომ სატრანსპორტო გამტარიანობა იყოს მაქსიმალურად მოსახერხებელი. აქვე ვიზრუნებთ იმაზეც, რომ შესაბამისი საგზაო ნიშნები განთავსდეს”, – თქვა ლაშა კომახიძემ.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან