აკრედიტაციის საბჭომ 2018 წელს 38 პროგრამის აკრედიტაციის საკითხი განიხილა. 19 პროგრამას სრული აკრედიტაცია მიანიჭა, 7 პროგრამას პირობითი აკრედიტაცია მისცა, 12 პროგრამას კი უარი უთხრა აკრედიტაციაზე.
პირობითი აკრედიტაცია, როგორც განათლების ხარისხის განვითარების ეროვნულ ცენტრში განმარტავენ, პროგრამას მაქსიმუმ ორი წლის ვადით ენიჭება, ამის შემდეგ სასწავლებელმა ისევ უნდა მიმართოს აკრედიტაციისთვის ცენტრს.
იმ შემთხვევაში, თუკი პროგრამა დადებითად არ შეფასდება, ის ხელმეორედ ვეღარ მიიღებს პირობით აკრედიტაციას.
დადებითი რეკომენდაციის შემთხვევაში, სრული აკრედიტაცია პროგრამას ოთხიდან შვიდი წლის ვადით ენიჭება.
აკრედიტაცია ვერ გაიარა საქართველოს ეროვნული უნივერსიტეტის (სეუ), საქართველოს ტექნიკური უნივერსიტეტის, ფიზიკური აღზრდისა და სპორტის სახელმწიფო სასწავლო უნივერსიტეტის, წმ. გრიგოლ ფერაძის თბილისის სასწავლო უნივერსიტეტის, საქართველოს დავით აღმაშენებლის სახელობის უნივერსიტეტის, იაკობ გოგებაშვილის სახელობის თელავის სახელმწიფო უნივერსიტეტის, ბათუმის რუსთაველის სახელმწიფო უნივერსიტეტისა და საქართველოს საზოგადოებრივ საქმეთა ინსტიტუტის (GIPA) გარკვეულმა პროგრამებმა. სულ 12-მა პროგრამამ.
როგორც განათლების ხარისხის განვითარების ეროვნული ცენტრის, უმაღლესი განათლების ხარისხის უზრუნველყოფის სამსახურის უფროსი, ლაშა მარგიშვილი გვეუბნება, იმ პროგრამებიდან, რომლებმაც აკრედიტაცია ვერ მიიღო, რვა იყო ახალი და არ ხორციელდებოდა, დანარჩენი პროგრამებით კი სწავლება მიმდინარეობდა.
„ბათუმელების“ კითხვაზე, რადგან ამ პროგრამებმა ვერ მიიღო აკრედიტაცია, ნიშნავს თუ არა ეს, რომ სტუდენტებმა უხარისხო პროგრამით ისწავლეს? – ლაშა მარგიშვილი ამბობს, რომ ამ პროგრამებს აკრედიტაცია მიღებული ჰქონდათ 2012-2013 წლებში. ეს იმას ნიშნავს, რომ ის იმ დროინდელ მოთხოვნებს აკმაყოფილებდა.
„დღეს უკვე 2018 წელია და ბევრი რამ შეიცვალა. ამ პროგრამების ძირითადი ხარვეზების ნაწილი მოდიოდა პროგრამის შინაარსზე, შინაარსის განახლებაზე, სასწავლო რესურსების განახლებაზე და ადამიანური რესურსების გაძლიერებაზე“, – ამბობს მარგიშვილი.
დაწესებულებას შეუძლია აკრედიტაციის საბჭოს რეაკრედიტაციისთვის ისევ მიმართოს. კონკრეტული ვადები ამისთვის დადგენილი არ არის. „ბუნებრივია, თუ დაწესებულებამ ხარვეზები არ გამოასწორა, რეაკრედიტაციისთვის მიმართვას აზრი არ აქვს“, – ამბობს მარგიშვილი.
იმ პროგრამებზე, რომლებსაც აკრედიტაცია არ მიენიჭა, 2018 წელს უნივერსიტეტები სტუდენტების მიღებას ვერ შეძლებენ.
აკრედიტაციის საბჭომ 2018 წელს ორ უმაღლეს სასწავლებელს ავტორიზაციაც გაუუქმა. ესენია „ჰიპოკრატე“ და თბილისის საერთაშორისო აკადემია. ხოლო დეკემბერში, ავტორიზაცია გაუუქმდა ამერიკის ბიზნესის აკადემიას უნივერსიტეტის ადმინისტრაციის მოთხოვნით. „არ ფუნქციონირებდა ეს უნივერსიტეტი და თვითონ მოითხოვა აკრედიტაციის გაუქმება“, – ამბობს მარგიშვილი.
მისივე ინფორმაციით, „ჰიპოკრატეში“ და „თბილისის საერთაშორისო აკადემიაში“ დაახლოებით 500-მდე სტუდენტი სწავლობს, რომლებიც მობილობის მეშვეობით სხვადასხვა სასწავლებელში გადანაწილდებიან.
ამავე თემაზე:
https://batumelebi.netgazeti.ge/news/117399/
