აზიური ფაროსანას საწინააღმდეგოდ ბიფეტრინის ჯგუფის პრეპარატების დარიგებას სოფლის მეურნეობის სამინისტრო მოსახლეობისთვის მონიტორინგის შედეგების მიღების შემდეგ განსაზღვრავს. 2018 წლის ფაროსანასთან ბრძოლის სტრატეგიით სრულმასშტაბიანი მონიტორინგია დაგეგმილი. სწორედ ამის შემდეგ გადაწყდება, დაარიგებენ თუ არა წელსაც პესტიციდებს. პესტიციდები გამოიყენება ფოთლის მავნებლების, მათ შორის აზიური ფაროსანას, ყურძნის ჭიის, ტკიპების, ბუგრების, ნაყოფჭამიების, ხვატრების, ხოჭოების, მავნე კუსებურას და სხვა მავნებლების წინააღმდეგ ვაზში, ხეხილში, ბოსტნეულში, მარცვლეულში და პარკოსნებში.
ინსტრუქციაში, რომელიც სამინისტრომ გასულ წელს შხამთან ერთად დაურიგა მოსახლეობას, ნათქვამია, რომ აზიური ფაროსანას წინააღმდეგ ბიფენტრინით წამლობა უნდა ჩატარდეს სხვადასხვა შემასხურებელი მოწყობილობის მეშვეობით, მათ შორის სპეციალური ზურგსაკიდი შემასხურებელი აგრეგატით. ეს შეიძლება იყოს ვენახის შესაწამლი აპარატი.
რეკომენდირებულია, რომ 10 ლიტრ წყალში 30 მლ. პრეპარატი გაიხსნას. ინსტრუქციის მიხედვით, პრეპარატს არ გააჩნია მცენარეების მიმართ ფიტოტოქსიკურობა [მომწამვლელი არ არის], თუ მისი გამოყენებისას ნორმები დაცული იქნება.
ინსტრუქციის მიხედვით:
- წამლობა უნდა ჩატარდეს მოსავლის აღებამდე 30 დღით ადრე მრავალწლიან კულტურებზე
- 20 დღით ადრე მარცვლეულზე
- 15 დღით ადრე ბოსტნეულსა და პარკოსნებზე
- ამასთან, ბიფენტრინის ნარჩენების დონე მოსავალში არ უნდა აღემატებოდეს 0,04-0,4 მგ/კგ-ს.
წამლობა უნდა ჩატარდეს მხოლოდ დილის საათებში და არც ერთ შემთხვევაში ქარიან ამინდში. თუ ფუტკრის სკა გყავთ, დაუშვებელია პრეპარატის შესხურება ფუტკრის სკების მიმდებარედ.
ჯანდაცვის მსოფლიო ორგანიზაციის (WHO) საერთაშორისო კლასიფიკაციის მიხედვით, ბიფენტრინი ადამიანის მიმართ საშიშროების II კლასს მიეკუთვნება.
არ უნდა შეინახოთ კვების პროდუქტებთან, ცხოველთა საკვებთან და ადამიანებისათვის განკუთვნილ სხვა პროდუქციასთან ერთად. შეწამვლის დროს, თუ საკარმიდამო ნაკვეთში გაქვთ ჭა, ის უნდა დახუროთ. არ უნდა მოხვდეს წყალსადენებში, ტბებში და ნაკადულებში.
შეწამვლის დროს პესტიციდი უნდა მოარიდოთ კანს და თვალებს. პროცესში დაუშვებელია საკვების მიღება, თამბაქოს მოწევა ან ალკოჰოლის მიღება. ამასთან, კონტეინერის გახსნისას სასუნთქი გზები დაფარული უნდა გქონდეთ სპეციალური დამცავი ნიღბით. როდესაც შეწამვლას დაამთავრებთ, საკვების, სითხის მიღებამდე ან სიგარეტის მოწევამდე სახე და ხელები კარგად უნდა დაიბანოთ საპნით. ცალკე უნდა გარეცხოთ ხელთათმანები, სახის დამცავი ნიღაბი და დაბინძურებული ტანსაცმელი.
მას შემდეგ, რაც ბიფეტრინით ნაკვეთს შეწამლავთ, ბოთლი, რომელშიც სითხე ესხა, უნდა გაანადგუროთ. თუ მეტალისაა უნდა დახვრიტოთ, პლასტმასის დატეხოთ და შესაბამის ნაგავსაყარზე განათავსოთ.
თუ მუშაობის პროცესში მოიწამლეთ, სასწრაფოდ უნდა გაიხადოთ დაბინძურებული ტანსაცმელი, თუ პრეპარატი თვალში მოხვდა, 15 წუთის განმავლობაში გამდინარე წყლით დაიბანოთ თვალები, თუ შეისუნთქეთ, სასწრაფოდ უნდა დატოვოთ სამუშაო ზონა, ხოლო თუ გადაყლაპეთ, პირი უნდა გამოირეცხოთ და დიდი ოდენობის სითხე მიიღოთ. ამასთან, ნებისმიერი ტიპის მოწამვლის შემთხვევაში, აუცილებლად უნდა მიმართოთ ექიმს.
