ბათუმის მერი: როდის უნდა აღინიშნოს ,,ბათუმობის” დღესასწაული?

ბათუმის მერმა, ლაშა კომახიძემ, სახალხო დღესასწაულის „ბათუმობის“ აპრილში ჩატარების ინიციატივა სოციალურ ქსელში გააჟღერა. იდეის შეფასებას ის საზოგადოებას სოციალურ ქსელშივე სთხოვს:

„ბათუმობა ყოველი სექტემბრის პირველ შაბათ-კვირას აღინიშნება. თარიღი დაკავშირებულია ბათუმში 1888 წლის 25 აგვისტოსა და 2 სექტემბერს ჩატარებულ ხმოსანთა პირველ არჩევნებთან.

აღსანიშნავია, რომ 1885 წელს ბათუმის 90-მა მცხოვრებმა წერილობით მიმართა კავკასიის სამოქალაქო ნაწილის უფროსს ბათუმისათვის ქალაქის სტატუსის მინიჭების თაობაზე. 1888 წლის 28 აპრილს ბათუმს ქალაქის სტატუსი მიენიჭა.

გვსურს გავიგოთ მოსახლეობის აზრი ,,ბათუმობის“ დღესასწაულის ქალაქის სტატუსის მინიჭების დღეს აღნიშვნასთან დაკავშირებით.
,,ბათუმობის“ 28 აპრილს აღნიშვნა უფრო მეტ ხალისს შესძენს ამ დღესასწაულს, რადგან გაზაფხული სიცოცხლესთან, სიახლესთან და სინათლესთან ასოცირდება.

გამოხატეთ თქვენი აზრი ,,ბათუმობის“ აღნიშვნის თარიღის გადატანასთან დაკავშირებით. განსხვავებული შეხედულების შემთხვევაში, გთხოვთ დატოვოთ თქვენი მოსაზრება კომენტარის სახით.

თქვენი აზრით, როდის უნდა აღინიშნოს ,,ბათუმობის” დღესასწაული?“ –  წერს ლაშა კომახიძე „ფეისბუქის“ ოფიციალურ გვერდზე.