სიახლეები

ანბანის კოშკი, ინვესტორი და ვალდებულებები

30.07.2015 • 2754
ანბანის კოშკი, ინვესტორი და ვალდებულებები

აჭარის მთავრობასთან აღებული ვალდებულების თანახმად, ბათუმის ანბანის კოშკში გასართობი ობიექტები ინვესტორმა ხელშეკრულების დადებიდან სამ თვეში უნდა გახსნას. ეს იმას ნიშნავს, რომ გასართობი ობიექტების გახსნა ანბანის კოშკში ამ საკურორტო სეზონზე ვერ მოხერხდება.

აჭარის მთავრობამ ბათუმის ბულვარში 1344,7 კვ/მ შენობა – ანბანის კოშკი და მასზე მიმაგრებული 5736 კვ/მ არასასოფლო-სამეურნეო დანიშნულების მიწის ნაკვეთი კომპანია  „Boost Spain S.I.“-ს 20 წლის ვადით გადასცა. ქონებით სარგებლობის წლიურ საფასურად კი, სიმბოლური ფასი, ერთი ლარი დაუწესა.

ქონების მესაკუთრესთან, ანუ აჭარის მთავრობასთან აღებული ვალდებულების მიხედვით, კომპანიას სარგებლობაში გადაცემული ქონების მშენებლობის დროს გამოყენებული ტექნოლოგიური პროცესების დაცვით დამუშავება ევალება. ასევე ხელშეკრულების გაფორმებიდან სამ თვეში კომპანიამ ლიფტების გამართულობა და ექსპლუატაციაში გაშვება უნდა უზრუნველყოს. იმავე ვადაში უნდა გამართოს განათების სისტემა და ეს ყველაფერი კომპანიამ ობიექტის სარგებლობის პერიოდში უნდა შეინარჩუნოს. საბოლოო ჯამში კი ხელშეკრულების დადებიდან სამ თვეში, ანუ მიმდინარე წლის სექტემბერში კომპანიამ კოშკში მრავალფუნქციური ობიექტები: რესტორანი და კაფე უნდა აამოქმედოს.

კომპანიამ აიღო ასევე ვალდებულება უზრუნველყოს „მიმზიდველი ადგილის მოწყობა  ტურისტებისთვის ქალაქის ხედების დასათვალიერებელი „გადმოსახედის სახით“, დაასაქმოს არანაკლებ საქართველოს ათი მოქალაქე.

„Boost Spain S.I.“ – ესპანური კომპანიაა და მისი დამფუძნებელი ესპანეთის მოქალაქე ბართლომეო სორელ სელმანკაა. რეესტრის მონაცემებით, ბართლომეო სორელ სელმანკა ფლობს საქართველოში 2015 წლის აპრილში დარეგისტრირებული კომპანიის – „ბუსტ ჯორჯიას“ 67 პროცენტს, დარჩენილი 33 პროცენტის მფლობელი კი საქართველოს მოქალაქე ზურაბ ნასყიდაშვილია. ზურაბ ნასყიდაშვილი კიდევ ერთი კომპანიის მფლობელია – მან 2014 წელს „ბიზნეს მენეჯმენტ ჯგუფი“ დააფუძნა და კომპანიას ერთპიროვნულად ფლობს.

ანბანის კოშკი ბათუმში /ფოტოები ბათუმელების არქივიდან/

გადაბეჭდვის წესი


ასევე: