მთავარი,სიახლეები

10 ოჯახი ელექტროენერგიის ჩასართავად სახელმწიფოს დახმარებას სთხოვს

26.01.2018 • 1590
10 ოჯახი ელექტროენერგიის ჩასართავად სახელმწიფოს დახმარებას სთხოვს

აქცია იყო დღეს ბათუმში, ოპიზრების ქუჩაზე, სადაც თვითნებურად ჩასახლებული 10 ოჯახი ხელისუფლებას სთხოვს დახმარებას, რადგან ელექტროენერგიის გარეშე არიან დარჩენილნი. ეს ქუჩა ე.წ. „ოცნების ქალაქთან“ ახლოს მდებარეობს. აქციაზე იმყოფებოდა ადამიანის უფლებადამცველი, თამაზ ბაკურიძე, რომლის თქმითაც, ეს ოჯახები აქ დაახლოებით შვიდი წლის წინ დასახლდნენ და მათ შორის არიან მრავალშვილიანი და სოციალურად დაუცველები:

„აქვე, ახლოს ოჯახები ცხოვრობდნენ, რომლებიც გასახლებას დაექვემდებარნენ ავტობანის მშენებლობის გამო. ერთ-ერთი ოჯახიდან ჰყავდათ მათ ელექტროენერგია გამოყვანილი თვითნებურად. ის ოჯახი უკვე აქ აღარ ცხოვრობს და მოსახლეობა დენის გარეშე დარჩა. ახალ წლამდე მათ მიმართეს საკრებულოს წევრ ანზორ დევაძეს. საკრებულომ კი ეს ოჯახები „ენერგო-პრო ჯორჯიაში“ გადაამისამართა… გამოსავალი ერთია, სახელმწიფო არ უნდა წავიდეს წინააღმდეგი, როგორც ამ ტერიტორიის მესაკუთრე და დართოს ამ 10 სოციალურად დაუცველ ოჯახს ნება, მიაწოდონ ელექტროენერგია. ენერგოკომპანია მათ მოსთხოვს საკუთრების უფლებას, რომელიც მათ არა აქვთ, ამიტომაცაა აუცილებელი სახელწიფოს დახმარება“, – ამბობს თამაზ ბაკურიძე.

ბათუმის საკრებულოს წევრი, ანზორ დევაძე ამბობს, რომ ოპიზრების ქუჩაზე მცხოვრები ოჯახების გასაჭირის შესახებ უკვე იცის და მათი პრობლემის გადაწყვეტას ბათუმისა და ხელვაჩაურის მერიების საშუალებით შეეცდება, რადგან ამ ტერიტორიის ნაწილი ბათუმს ეკუთვნის, ნაწილი კი – ხელვაჩაურს:

„ჩაწერილი არ არიან, მაგრამ შუქი და გათბობა სჭირდებათ. საქმის კურსში უნდა ჩავაყენო ბათუმის და ასევე, ხელვაჩაურის მერი, რომ რაღაცით დავეხმაროთ ამ ხალხს. ალბათ შევძლებთ ამას, ერთი თვის განმავლობაში მაინც“, – ამბობს ბათუმის საკრებულოს წევრი.

 

გადაბეჭდვის წესი


ასევე: