რატომ არ რეაგირებს აჭარის მთავრობა, როცა რეგიონიდან ხეები უკანონოდ გააქვთ? – ეს შეკითხვა „ბათუმელებმა“ აჭარის მთავრობის თავმჯდომარეს ბათუმის სტადიონის საძირკვლის გახსნის ცერემონიალის დასრულების შემდეგ დაუსვა.
„ყველაფერი კეთდება კანონის ფარგლებში და ამ კითხვებზე ცალკე გავმართავ თქვენთან შეხვედრას, მზად ვარ გესაუბროთ,“ – აღნიშნა ზურაბ პატარაძემ. მას ვთხოვეთ დაკონკრეტება, რა იგულისხმება „კანონის ფარგლებში“ და აქვს თუ არა ბიძინა ივანიშვილს ათეულობით ხის ამოღებისა და გატანის ნებართვა. „ყველაფერი კეთდება კანონის ფარგლებში,“ – გაიმეორა მან.
ჩაქვში, უმაღლესი საბჭოს მიმდებარე ტერიტორიაზე, ბიძინა ივანიშვილის დენდროპარკში გადასატანად მრავალწლოვან ხეებს იღებენ. რის საფუძველზე იღებენ და გააქვთ ხეები? – ეს კითხვა გასულ კვირას დაუსვა „ბათუმელებმა“ აჭარის მთავრობას. უწყებამ ვერ მოგვაწოდა დოკუმენტი, რითაც დადასტურდებოდა, რომ ხეებს, რომლებსაც ჩაქვიდან გასატანად ამზადებენ, კანონიერად იღებენ. მთავრობის მიერ მოწოდებულ დოკუმენტში მხოლოდ იმაზეა საუბარი, რომ მთავრობა არ არის წინააღმდეგი 19 ერთეული ცრუ ქაფურის ხე გაჩეხოს კომპანიამ.
ათეულობით ქაფურის ხეა უკვე მოჭრილია. ხეებს კომპანია „ატუ“ ჭრის.
ხეების ამოღება და გატანა სათანადო ნებართვის გარეშე კანონის დარღვევაა. სწორედ ამ უკანონობაზე რეაგირების შესახებ ვკითხეთ დღეს ზურაბ პატარაძეს.
