ალექსანდრა ტერუნი აჭარის მთავარ პროკურორთან შეხვედრას ითხოვს. მას სახლი საიათნოვას 4-ში [ჩაის სახლის შენობა] მეზობელმა აუჭედა. ალექსანდრას ბინა უკვე მეზობელს ეკუთვნის, თუმცა აღსრულების ეროვნულ სამსახურს გამოსახლების პროცედურა ჯერ არ დაუწყია.
ალექსანდრა ამბობს, რომ მას პირადი ნივთებიც არ გამოუტანია ბინიდან, ოთახში ასევე ჩაკეტილია მისი კატა. მოხუცი შიმშილობს, ვიდრე მთავარი პროკურორი მას არ შეხვდება და არ მიეცემა ბინაში დაბრუნების უფლება, სადაც წლების განმავლობაში ცხოვრობდა.
ალექსანდრა ტერუნის გამოსახლების შესახებ უკვე არსებობს სასამართლოს გადაწყვეტილება, თუმცა გამოსახლების პროცედურა აღსრულების ეროვნულ ბიუროს ჯერ არ დაუწყია.
„ეს არის თვითნებურად გამოსახლება, რაც სისხლის სამართლის დანაშაულია. გამოსახლებისთვის ალექსანდრას აქვს დრო მიცემული 20 მარტამდე. მანამდე ჩვენ ვაპირებთ გავასაჩივროთ ბინის გასხვისება, რომელიც თაღლითური გზით განხორციელდა. იპოთეკით დატვირთული იყო რეალურად 17 კვადრატული მეტრი, ახალმა მესაკუთრემ კი, მთლიანი ბინა მიისაკუთრა. ჩვენ ვფიქრობთ, რომ შესაძლებელი იქნება ამ პერიოდში გამოსახლების პროცესის შეჩერება,“ – ამბობს ხანდაზმულის ინტერესების დამცველი, ლელა ბჟალავა.
