ხულოს მუნიციპალიტეტის სამ სოფელში საცხოვრებელ სახლებთან ზვავი ჩამოწვა, რის გამოც ოჯახებმა საცხოვრებელი სახლები დატოვეს.
ხულოს მერიის პრესსამსახურის უფროსის, თორნიკე მიქელაძის ინფორმაციით, ზვავი რიყეთში, ოშანახევსა და ხიხაძირში საცხოვრებელ სახლებთან ჩამოვიდა. ოჯახებმა სახლები დატოვეს და მეზობლებს შეაფარეს თავი.
ხულოს მერიაში განმარტავენ, რომ ზვავს საცხოვრებელი სახლები არ დაუზიანებია, თუმცა ზვავის განმეორების საშიშროება ისევ არის.
რამდენიმე წუთის წინ მეწყრული პროცესები განვითარდა ქედის მუნციპალიტეტის სოფელ ახოსა და ბალაძეებშიც, სადაც შიდა საუბნო გზებზე ჩამოსულმა მიწის მასამ რამდენიმე ოჯახთან დამაკავშირებელი საუბნო გზა ჩაკეტა.
ხულოს მუნიციპალიტეტის მერიაში ამინდის გაუარესებასთან დაკავშირებით, მერის, გოჩა მელაძის ხელმძღვანელობით, მუდმივმოქმედი საგანგებო შტაბის სხდომა გაიმართა. შეხვედრას შტაბის ძირითად წევრებთან ერთად მოწვეული წევრებიც ესწრებოდნენ. სხდომაზე მუნიციპალიტეტში ამ დროისათვის არსებული მდგომარეობა განიხილეს და შტაბის წევრებს მიეცათ შესაბამისი დავალებები არსებული შეფერხებების აღმოსაფხვრელად.
ხულოს მუნიციპალიტეტში უკვე მესამე დღეა ინტენსიურად თოვს. ამ დროისათვის თოვლის საფარმა გოდერძის უღელტეხილზე 2 მეტრს, მაღალი ზონის სოფლებში 1,5 მ-ს, ხოლო დაბლობში ერთ მეტრს მიაღწია.
