Batumelebi | თემურ კახიძე: სიტყვისა და გამოხატვის თავისუფლების შესახებ კანონში ცვლილებას ვითხოვ თემურ კახიძე: სიტყვისა და გამოხატვის თავისუფლების შესახებ კანონში ცვლილებას ვითხოვ – Batumelebi
RU | GE  

თემურ კახიძე: სიტყვისა და გამოხატვის თავისუფლების შესახებ კანონში ცვლილებას ვითხოვ

 

აჭარის უმაღლესი საბჭოს წევრი პარტია „თავისუფალი დემოკრატებიდან“, თემურ კახიძე  საქართველოს კანონში „სიტყვისა და გამოხატვის თავისუფლების შესახებ“  ცვლილების შეტანას ითხოვს. დეპუტატის განცხადებით, კანონში არ არის ნახსენები აჭარისა და აფხაზეთის  ავტონომიური რესპუბლიკები, რამაც შესაძლებელია  სამომავლოდ პრობლემები წარმოქმნას. 

 

„ჩვენ უმაღლესი საბჭოს დეპუტატებს კანონი გარკვეულ საკითხებში გვზღუდავს. მაგალითად, საკრებულოს წევრისგან განსხვავებით ჩვენ არ გვაქვს ბიზნესის ქონის უფლება და ა.შ.   ამიტომ, „სიტყვისა და გამოხატვის თავისუფლების შესახებ კანონშიც უნდა მოხდეს გარკვეული დეტალების დაზუსტება უმაღლესი საბჭოს დეპუტატებთან დაკავშირებით. მაგალითად, სარგებლობს თუ არა  უმაღლესი საბჭოს დეპუტატი იმავე უფლებებით, რითაც სარგებლობენ პარლამენტის  დეპუტატები და საკრებულოს წევრები, რადგან კანონში არ არის დაზუსტებული, რომ მე როგორც უმაღლესი საბჭოს დეპუტატს, დავის წარმოშობის შემთხვევაში, მაქვს თუ არა  უფლება არ გავამხილო ინფორმაციის წყარო და ვარ  თუ არა დაცული.

 

არის კიდევ სხვა დეტალებიც, ამიტომ საქართველოს პარლამენტმა უნდა შეიტანოს კანონში ცვლილება და ავტონომიებთან დაკავშირებული დეტალები დააზუსტოს“ – აცხადებს უმაღლესი საბჭოს იურიდიულ და საპროცედურო საკითხთა კომისიის თავმჯდომარე თემურ კახიძე.

 

საკანონმდებლო ინიციატივა, როგორც თემურ კახიძე აცხადებს, მას ეკუთვნის და მას დღეს, 7 მაისს, უმაღლესი საბჭოს კომისიებში განიხილავენ.  

 

 

 

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე