მომავალ წელს ქუჩის ძაღლების რეგულაციასთან დაკავშირებით ბათუმის მერია სიახლეებს გეგმავს. ამის თაობაზე მერიის ჯანმრთელობისა და სოციალური სამსახურის უფროსმა მარინე რუხაძემ დღეს, 8 ნოემბერს, „დემოკრატიული ჩართულობის ცენტრში“ 2018 წლის მერიის ჯანდაცვისა და სოციალური პროგრამების ბიუჯეტის განხილვის დროს ისაუბრა.
მარინე რუხაძის თქმით, იმ შემთხვევაში, თუკი ქუჩაში მცხოვრები ძაღლი გარშემომყოფებისთვის საფრთხეს წარმოადგენს, მისი ევთანაზია კომისიური წესით მოხდება, 6 თვემდე ძაღლის ლეკვებსა და კატის კნუტებს კი მერია სპეციალურ ვოლიერში გადაიყვანს და ბუნებრივ გარემოში აცრების შემდეგ დააბრუნებს.
„წლების წინ ნამდვილად არაჰუმანური გზებით ხდებოდა ცხოველებზე ზემოქმედება და ეს მიდგომები მნიშვნელოვნად შეიცვალა. ჩვენ ვაპირებთ მომავალ წელს გამოვყოთ ბიუჯეტი 6 თვემდე ლეკვებისა და კნუტებისთვის, გავაკეთოთ მათთვის პატარა ვოლიერები, სადაც მათთვის კვებაც არის გათვალისწინებული და აცრების და სხვა ღონისძიებების ჩატარების შემდეგ ისინი კვლავ ნეიტრალურ ზონაში დავაბრუნოთ,“ – ამბობს მარინე რუხაძე.
პროგრამის განხილვის დროს ქუჩაში მყოფი ცხოველების მისამართით მოქალაქეების მხრიდან პრეტენზიებიც გამოითქვა. ერთ-ერთი მოქალაქის თქმით, „დევნილთა დასახლებაში იმდენი ქუჩის ძაღლია, რამდენიც მთელ ქალაქში შეიძლება არ იყოს ერთად აღებული“. მისი აზრით, მერიამ ამ პრობლემის მოგვარებაზე უნდა იზრუნოს, „რადგან რაც უნდა ავცრათ ძაღლი და დავბირკოთ, მისი მაინც ეშინიათ ბავშვებს და უბნის სხვა მცხოვრებლებსაც“.
ერთ-ერთი მოქალაქის თქმით, როგორც ტურისტებისთვის, ასევე ადგილობრივი მოსახლეობისთვის პრობლემაა ქუჩის ძაღლების გადაადგილება ბულვარში და პარკებში. „ვფიქრობ არ არის ლამაზი, როცა ექვსი უზარმაზარი ძაღლი ერთად დადის ბულვარში, სადაც ბავშვები და ტურისტები სეირნობენ,“ – ამბობს ის.
ქუჩის ძაღლების პრობლემაზე ისაუბრა კიდევ ერთმა მოქალაქემ. მისი თქმით, განსაკუთრებით ბევრი ქუჩის ძაღლია ხელვაჩაურში, მერია კი ყურადღებას არ აქცევს.
„ეს არ არის მარტო სამრეწველო ზონა, ამ ზონაში ათი ათასამდე ადამიანი ცხოვრობს, მათ შორის ბავშვები, რომლებიც სკოლაში დადიან და ქუჩაში გადაადგილების დროს, ქუჩის ძაღლები მათ აშინებთ“.
მარინე რუხაძის თქმით, მერიას არ აქვს შესაძლებლობა, რომ დიდი ვოლიერები გააკეთოს და იქ ქუჩის ყველა ძაღლი სტაციონარულად განათავსოს.
„ხშირია შემთხვევა, როცა შინაური ცხოველები სოფლებიდან ჩამოჰყავთ ადამიანებს და ქუჩაში უშვებენ. ასევე ხშირია შემთხვევები, როცა ადამიანები თავიანთ შინაურ ცხოველებს ქუჩაში აგდებენ, ავად გახდომის ან სხვა მიზეზების გამო. ვფიქრობ, მოსახლეობის პასუხისმგებლობაც უნდა გაიზარდოს და ასეთ შემთხვევებში მოქალაქეები უნდა დაჯარიმდნენ,“ – განაცხადა მან.
