2 აპრილი აუტიზმის შესახებ ინფორმაციის გავრცელების საერთაშორისო დღეა. ბათუმის „დემოკრატიული ჩართულობის ცენტრში“ არასამთავრობო ორგანიზაცია „ცვლილებები თანაბარი უფლებებისთვის“ მიერ ორგანიზებული საინფორმაციო ხასიათის შეხვედრა გაიმართა. დისკუსიაში მონაწილეობდნენ ფსიქოლოგი შორენა მამულაძე და აუტიზმის სპეციალისტი ქეთი გოგიტიძე, აგრეთვე სამოქალაქო საზოგადოების, მედიის წარმომადგენლები და სტუდენტები.
შეხვედრის მიზანია გაიზარდოს აუტიზმის შესახებ საზოგადოების ინფორმირებულობა და ხელი შეუწყოს გადაწყვეტილების მიმღებ დაინტერესებულ ადგილობრივ სახელისუფლებო ორგანოებს, შეასრულონ საქართველოს მიერ აღებული საერთაშორისო ვალდებულება და უზრუნველყონ აუტიზმის მქონე ადამიანების უფლებების რეალიზება.
2007 წლიდან გაეროს გენერალური ასამბლეის მიერ 2 აპრილი აუტიზმის შესახებ ინფორმაციის გავრცელების საერთაშორისო დღედ გამოცხადდა, რომლის მიზანია დაავადების შესახებ საზოგადოების მაქსიმალური ინფორმირება და აუტიზმით დაავადებულთა უფლებების რეალიზება.
აუტიზმის შემთხვევათა საგრძნობი მატების ფონზე, აღნიშნული პრობლემა მსოფლიოს საზოგადოებრივი ჯანმრთელობის გლობალურ კრიზისად შეფასდა. საქართველო „აუტიზმის შესახებ ინფორმაციის გავრცელების მსოფლიო დღეს“ 2011 წელს შეუერთდა.
