Batumelebi | ეტლით მოსარგებლეთა პრობლემებზე საკრებულოს შენიშვნები მისცეს ეტლით მოსარგებლეთა პრობლემებზე საკრებულოს შენიშვნები მისცეს – Batumelebi
RU | GE  

ეტლით მოსარგებლეთა პრობლემებზე საკრებულოს შენიშვნები მისცეს

 

შეზღუდული შესაძლებლობის მქონე პირმა რამინ მაჭარაშვილმა საკრებულოს ღია კარის დღეზე შშმ პირებს პრობლემებთან დაკავშირებით საკრებულოს წევრებს რეკომენდაცია მისცა.  მისი თქმით, ეტლით მოსარგებლეები ვერ ახერხებენ ქუჩებსა და შენობებში კომფორტულად გადაადგილებას.

მოქალაქები ბათუმის საკრებულოში, ღია კარის დღეზე

„ქუჩებში არ არის ადაპტირებული გადასასვლელები გაკეთებული, ავტობუსის გაჩერებაზე ხშირად აჩერებენ სხვა ტრანსპორტს მძღოლები და ავტობუსი ვერ შლის პანდუსს, ამიტომ  შშმ პირებს სხვისი დახმარება ესაჭიროებათ, რომ ტრანსპორტში ავიდნენ, იქნებ საკრებულომ ასეთი მძღოლებისთვის საჯარიმო სანქციები გაამკაცროს“- ამბობს რამინ მაჭარაშვილი.

ის სხვა პრობლემებზეც საუბრობს: „არც ბაღები და სკვერებია  ადაპტირებული შშმ პირებისთვის. პანდუსები იმდენად დახრილია, რომ მისი გამოყენება შეუძლებელია. მაშინ რა აზრი აქვს მათ არსებობას?“

რამინ მაჭარაშვილმა ყურადღება გაამახვილა გაეროს კონვენციაზეც: „კონვენციის თანახმად 2016 წლამდე საქართველოში ყველა საჯარო დაწესებულების ადაპტირება უნდა მოხდეს, თუმცა არც მერიაში, არც გამგეობებში და სხვა საჯარო დაწესებულებებში არ  შეინიშნება,  რომ შენობების ადაპტირება მიდიოდეს. შშმ პირებს უნდა გვქონდეს  სხდომებზე მისვლის და ჩვენი აზრის თავისუფლად ამოხატვის შესაძლებლობა.  ჩვენ გვითხრეს, რომ ზოგიერთი შენობა კულტურული მემკვიდრეობის ძეგლია და ვერ მოვახდენთ მათზე ზემოქმედებასო, მაგრამ ამ შემთხვევაში შესაძლებელი იქნება გამოვიყენოთ ლიფტი, ან ისე გაკეთდეს, რომ არ შეიცვალოს შენობის იერ-სახე,“ – ამბობს ის.

რამინ მაჭარაშვილმა ყურადღება გაამახვილა შშმ პირების დასაქმებაზეც.

„მერიამ ხელი უნდა შეუწყოს  ამ საკითხს და საკრებულომ უნდა მიიღოს ისეთი რეგულაციები, რომ, ვთქვათ, კერძო პირებს,    ვინც დაასაქმებს შშმ  პირებს, შეუმცირდეთ გადასახადები“.

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე