ელექტრონული რიდერების მოყვარულებისთვის ამაზონი ხვალ, 2017 წლის 31 ოქტომბრიდან Amazon Kindle Oasis e-reader -ის მეორე თაობის მოდელს უშვებს, რომელსაც 7 დუიმიანი ეკრანი, წყალგამძლე დიზაინი და აუდიო მხარდაჭერა აქვს, რაც ქინდლის ისტორიაში პირველად, აუდიო-წიგნების მოსმენის საშუალებასაც იძლევა. ახალი ქინდლი 194 გრამს იწონის და amazon.com-ზე 249,99 $ ეღირება, მის წინამორბედთან შედარებით, რომელიც 289,99 $ ღირს ეს 40$-ით ნაკლები ფასია.
ახალი დიზაინი წინამორბედისას ჰგავს: მარცხენა მხარე შედარებით სქელია და მოსახერხებელია ხელში დასაჭერად, ეს შტრიხი წიგნის ასოციაციას უქმნის მკითხველს. ამჯერად ამაზონმა მკვებავი ელემენტი ელექტრონულ წამკითხვლშივე ჩააშენა. Kindle Oasis-ი ორ საათში იმუხტება კომპიუტერთან USB კაბელის მიერთებით.
განახლებულ ქინდლს დღემდე გამოსულ სხვა მოდელებთან შედარებით ყველაზე დიდი და ნათელი ეკრანი აქვს, რასაც 12 შუქდიოდური ინდიკატორი უზრუნველყოფს. როგორც ამაზონ ქინდლის ყველა სხვა მოდელი, Oasis Kindle-ც თვალებისთვის უსაფრთხოა. შუქი მხოლოდ ეკრანს ანიჭებს ქათქათა ფურცლის ეფექტს და გამოსხივება არ არის მიმართული მკითხველისკენ.
ფოტო: Amazon.com
Oasis Kindle-ის 2017 წლის ახალი მოდელის ზედაპირი ორივე მხრიდან ალუმინის თხელი ფენითაა დაფარული და წყალგაუმტარობას უზრუნველყოფს. აქვს აუდიო, განახლებადი პროგრამული მხარდაჭერა. როგორც ამაზონში ამბობენ, ქინდლის შედარებით ძველ მოდელებსაც ჩაერთვებათ აუდიო მხარდაჭერა შესაბამისი პროგრამის განახლების შემდეგ.
სხვადასხვა მეხსიერების მქონე ახალ Oasis Kindle-ს ფასიც სხვადასხვა აქვს. 8 გიგაბაიტიანი მოდელი 249,99 $, 32 გიგაბაიტიანი 279,99$ და 32 გიგაბაიტიანი მოდელი Wi-Fi მხარდაჭერით 349,99 $ ღირს ამერიკაში.
ქინდლის მოყვარულები მიიჩნევენ, რომ გაჯეტისთვის ეს ფასი საკმაოდ მაღალია, მით უფრო, რომ 119 $-ად ძველი მოდელის, Kindle Paperwhite-ის შეძენა შეიძლება, რომელსაც მართალია Kindle Oasis-ვით დიდი ეკრანი არ აქვს და არც წყალგამძლეა, თუმცა კითხვისთვის საკმაოდ მოსახერხებელია.
