აჭარის ფინანსთა და ეკონომიკის სამინისტროს ბათუმში ესტაკადის მშენებლობის ზედამხედველობისთვის ბიუჯეტში 140 ათასი ლარი აქვს გათვალისწინებული. ზედამხედველს სამინისტრო ელექტრონული ტენდერით გამოავლენს, სადაც წინადადებების მიღება 4 ნოემბერს დაიწყება და 6 ნოემბერს დასრულდება.
ტექნიკური ზედამხედველობის მომსახურება მოიცავს სამუშაოების ხარისხის სისტემატიური კონტროლის განხორციელებას. სატენდერო პირობების თანახმად, სხვა მოთხოვნებთან ერთად „ზედამხედველმა უნდა შეამოწმოს სამუშაოს წარმოებისას გამოსაყენებელი მასალების, დეტალების, კონსტრუქციების, მოწყობილობების პასპორტების (სერთიფიკატების), ლაბორატორიული ანალიზების, გამოცდების არსებობა და მათი შესაბამისობა პროექტით მოთხოვნილ პარამეტრებთან;
საჭიროების შემთხვევაში მოითხოვოს სამშენებლო კომპანიისაგან საშენი მასალების დამატებითი ლაბორატორიული გამოცდების განხორციელება;
ხელშეკრულების გაფორმებიდან ყოველი თვის ბოლოს ტექნიკურმა ზედამხედველმა შემსყიდველს უნდა წარუდგინოს ყოველთვიური ტექნიკური ანგარიში განვლილ პერიოდში მის მიერ განხორციელებული ტექნიკური ზედამხედველობის შედეგების შესახებ; ტექნიკურ ანგარიშში ასახული უნდა იყოს სამშენებლო პროცესის ყველა ხარვეზი ფოტოფიქსაციის მასალებთან ერთად, რეკომენდაციები მათ გამოსასწორებლად და მათი გამოსწორების შედეგები და სხვ.“
ბათუმის პორტთან, ბაქოს ქუჩაზე, ესტაკადის მოწყობაზე გამოცხადებულ ტენდერში აჭარის ფინანსთა და ეკონომიკის სამინისტრომ გამარჯვებული კომპანია გამოავლინა, რომელიც ესტაკადას 14 370 000 ლარად ააშენებს. ტენდერში გამარჯვებული „კავკასუს როუდ პროჯექტია“, რომელმაც ესტაკადა ხელშეკრულების გაფორმებიდან 320 დღეში უნდა ააშენოს.
კომპანიასთან ესტაკადის მშენებლობაზე ხელშეკრულება ჯერ გაფორმებული არ არის.
ამავე თემაზე:
