დღეს, 10 დეკემბერს, საქართველოს სხვადასხვა უნივერსიტეტის სტუდენტებმა განცხადება გაავრცელეს.
სტუდენტები აცხადებენ, რომ ემიჯნებიან იზოლაციაში მოქცეულ რუსულ განათლებას და ირჩევენ ევროპულ მომავალს.
„ქართული ოცნების“ 12-წლიანი მმართველობის პირობებში უმაღლესი განათლების სისტემის ხარისხი საგრძნობლად ჩამორჩა ევროპული უმაღლესი განათლების სისტემის ხარისხს.
მმართველობის მე-12 წლისთავზე მთლიანად განათლების სექტორს აქვს დაკარგული პოლიტიკური ნეიტრალიტეტი და მოქცეულია პარტიული გავლენების ქვეშ. ამ ყველაფერმა კი გამოიწვია საქართველოს უმაღლესი განათლების სისტემის მიერ ევროპის ხარისხის უზრუნველყოფის რეგისტრაციის დაკარგვა და შეუქმნა საფრთხე უმაღლესი განათლების ხარისხის უზრუნველყოფის ევროპული ასოციაციის წევრობას.
ქართველი სტუდენტები ვკარგავთ უკეთესი განათლების მიღების შესაძლებლობას, დიპლომების საერთაშორისო არენაზე აღიარების, ევროპული განათლების მიღების შესაძლებლობას. ქართული განათლების სისტემა ევროპული საგანმანათლებლო სივრცისაგან იზოლაციაში ექცევა.
გვიჩნდება კითხვა: თუ დავკარგავთ უკეთესი, ევროპული განათლების მიღების შესაძლებლობას, კენწეროში ნამდვილად გატკბილდების?
ქართველი სტუდენტები ვემიჯნებით იზოლაციაში მოქცეულ, რუსულ განათლებას და ვირჩევთ საერთაშორისო სტანდარტის ევროპულ განათლებას. ამიტომ, სტუდენტები და ლექტორები, 11-ში, ოთხშაბათს, 4 საათზე ვიკრიბებით განათლების სამინისტროსთან. ერთად შევახსენოთ განათლების სექტორში დასაქმებულებს, ვის წინაშე არიან ანგარიშვალდებულნი და რისთვის მუშაობენ.
8-ის ნახევარზე კი მარშით ვუერთდებით პარლამენტის წინ მიმდინარე აქციას და აქციის მოთხოვნებს:
- დაინიშნოს ვადამდელი არჩევნები;
- დაუბრუნდეს ქვეყანა ევროპულ საგარეო კურსს;
- გათავისუფლდნენ პოლიტიკური პატიმრები“
– ნათქვამია განცხადებაში.
- რა ხდება?
საქართველოში მიმდინარეობს მასშტაბური პროტესტი, რომელმაც არა მარტო თბილისი, არამედ საქართველოს სხვა ქალაქებიც მოიცვა. მასობრივი აქციები მოჰყვა „ქართული ოცნების“ განცხადებას იმის თაობაზე, რომ ისინი აჩერებენ ევროკავშირთან მოლაპარაკებებს ევროკავშირში გაწევრიანების თაობაზე.
28 ნოემბრიდან დღემდე ათასობით ადამიანი გამოდის საპროტესტო აქციებზე თბილისში, ბათუმსა და საქართველოს სხვა ქალაქებში. დაკავებულია და სასტიკად ნაცემი ასობით ადამიანი, მათ შორის, მედიის წარმომადგენლები. არაიდენტიფიცირებადი პირები ჯგუფურად თავს ესხმიან ქუჩებში მოქალაქეებსა და მედიის წარმომადგენლებს.
