ბათუმის მერის ხელფასი ახალი წლიდან 2 110 ლარით გაიზრდება და 8 760 ლარი იქნება. ამ დრომდე ბათუმის მერის, არჩილ ჩიქოვანის ხელფასი 6 650 ლარი იყო.
ანუ მერის ხელფასი იანვრიდან 31,7 პროცენტით გაიზრდება, მაშინ, როცა ქვეყნის მთავრობას გაცხადებული აქვს, რომ საჯარო სექტორში დასაქმებულთა ხელფასები იანვრიდან მხოლოდ 10 პროცენტით გაიზრდებოდა.
საქართველოს 2025 წლის ბიუჯეტის პროექტში აღნიშნულია, რომ „საბაზო თანამდებობრივი სარგო 2024 წელთან შედარებით იზრდება 10 პროცენტით და განისაზღვრება 1 460 ლარის ოდენობით, რაც უზრუნველყოფს საჯარო სექტორში დასაქმებულთა ხელფასების ზრდას ასევე 10 პროცენტის ოდენობით.“
რატომ იზრდება მერის ხელფასი 31,7 პროცენტით? – საქმე ისაა, რომ „საჯარო დაწესებულებაში შრომის ანაზღაურების შესახებ“ საქართველოს კანონით, „პოლიტიკური თანამდებობის პირის თანამდებობრივი სარგო დგინდება ამავე კანონით დადგენილი შესაბამისი კოეფიციენტის საბაზო თანამდებობრივ სარგოზე ნამრავლით“.
ანუ, აღმასრულებელი ორგანოს ხელმძღვანელის [ამ შემთხვევაში ქალაქის მერის, როგორც პოლიტიკური თანამდებობის პირის] თანამდებობრივი სარგოს ზედა ზღვრის კოეფიციენტი არის 6. საბაზო თანამდებობრივი სარგო 2025 წლიდან კი, იქნება 1 460 ლარი. შესაბამისად, ბათუმის მერის ხელფასი განისაზღვრა 6 × 1 460 = 8 760 ლარით.
„ქალაქ ბათუმის მერიის პოლიტიკური თანამდებობის პირების და პროფესიული საჯარო მოხელეების თანამდებობრივი სარგოები და საშტატო ნუსხა“ ქალაქის საკრებულომ 2024 წლის 25 ნოემბერს დაამტკიცა. საკრებულოს დადგენილება 2025 წლის პირველი იანვრიდან შევა ძალაში.
ამავე დადგენილებით და ზემოთ ნახსენები პრინციპით ბათუმის მერიაში 2025 წლის იანვრიდან გაიზრდება მერის მოადგილეებისა და სხვა საჯარო მოხელეების ხელფასებიც.
მაგალითად:
- ბათუმის ვიცე-მერის ხელფასი დღეს არის 5 680 ლარი, იანვრიდან კი მისი ხელფასი 1 620 ლარით [28,5 პროცენტით] მეტი, ანუ 7 300 ლარი იქნება.
- ბათუმის მერს ორი მოადგილე ჰყავს. რომელთა ხელფასებიც, თითოეულის, 5 015 ლარიდან 6 570 ლარამდე [ანუ ერთი მოადგილის ხელფასი 1 555 ლარით, ანუ 31 პროცენტით] გაიზრდება.
20 პროცენტით [854 ლარით] გაიზრდება ბათუმის მერიის ადმინისტრაციის უფროსის ხელფასი და 4 256 ლარის ნაცვლად იანვრიდან იქნება 5 110 ლარი.
5 110 ლარამდე გაეზარდათ ხელფასები ასევე მერიის [პირველადი სტრუქტურული ერთეულის] სამსახურების უფროსებსაც.
თითქმის 23 პროცენტით გაიზარდა მერიის მეორადი სტრუქტურული ერთეულის – განყოფილების უფროსების ხელფასებიც – 3 325 ლარის ნაცვლად იანვრიდან იქნება 4 088 ლარი.
4 088 ლარი იქნება მერიის სამართლებრივი უზრუნველყოფის განყოფილების უფროსის ხელფასიც, თუმცა ამ შემთხვევაში ხელფასი 9,3 პროცენტით იზრდება – ამ განყოფილების უფროსის ხელფასი დღეს 3 724 ლარია.
ბათუმის 2025 წლის ბიუჯეტი საკრებულომ უკვე დაამტკიცა. შესაბამისად, დამტკიცებულია სახელფასო ხარჯებიც.
ბიუჯეტის მიხედვით, ბათუმის მერიაში და საკრებულოში დასაქმებულთა ხელფასებში მომავალ წელს 55 455 300 ლარი, ანუ 11,5 მილიონი ლარით მეტი დაიხარჯება, ვიდრე მიმდინარე 2024 წელს [წელს ხელფასებზე ქალაქის ბიუჯეტში 43 862 900 ლარია გაწერილი]. ბიუჯეტის მიხედვით, წინა წელთან შედარებით, 2025 წლისთვის იმ საჯარო მოხელეთა რაოდენობა, რომლებიც ხელფასს ქალაქის ბიუჯეტიდან იღებენ, მხოლოდ 109 ადამიანით იზრდება და ჯამში 2 952 იქნება.
რაც შეეხება საქართველოს 2025 წლის ბიუჯეტს, მისი [შესაბამისად საბაზო თანამდებობრივი სარგოს – 1 460 ლარის] დამტკიცება, არაკონსტიტუციურ პარლამენტს მოუწევს.
არცერთი ოპოზიციური პარტია, რომელმაც ცესკოს შედეგების მიხედვით 2024 წლის 26 ოქტომბრის არჩევნებში 5%-იანი ბარიერი გადალახა, პარლამენტში არ შედის. მათი პოზიციაა, რომ არჩევნები გაყალბდა და არ აპირებენ ამ პარლამენტის ლეგიტიმაციაში მონაწილეობის მიღებას.
კონსტიტუციონალისტების განმარტებით, იქამდე, სანამ საკონსტიტუციო სასამართლო არ მიიღებს გადაწყვეტილებას პრეზიდენტის სარჩელზე, პარლამენტის უფლებამოსილების ცნობა უკანონოა.
პრეზიდენტის სარჩელი საკონსტიტუციოში 20 ნოემბერს დარეგისტრირდა, თუმცა გამწესრიგებელი სხდომა ამ დრომდე არ გამართულა.
