„შეჭრილები” შუქს და წყალს ითხოვენ


 

დღეს, 10 ოქტომბერს,  სამხედრო ბატალიონის ყოფილ ტერიტორიაზე უკანონოდ ჩასახლებულმა ოჯახებმა აჭარის მთავრობის ადმინისტრაციული შენობის წინ საპროტესტო აქცია გამართეს. აქციის მონაწილეები ხელისუფლებისგან ელემენეტარული საყოფაცხოვრებო პირობების შექმნას და დაკავებული მიწის ნაკვეთების საკუთრებაში აღიარებას მოითხოვენ. 

 

 

 

 

„მოვითხოვთ, რომ გაგვიყვანონ ელექტროენერგია, წყალი და დაგვიდგან ნაგვის ურნები. ჩვენ გაუსაძლიs პირობებში ვცხოვრობთ“, – აცხადებენ აქციის მონაწილეები. ისინი ამბობენ, რომ ხელისუფლება მათ არჩევნების შემდეგ ქოხების დანგრევით დაემუქრა.

 

„ზუსტად არ ვიცი, რომელიც უწყებიდან იყო ის კაცი, მერიიდან თუ აჭარის მთავრობიდან და გვითხრა, რომ არჩევნების შემდეგ კინწისკვრით გაგყრით მაგ ქოხებიდანო. მხოლოდ საარჩევნოდ ვჭირდებით ყველას, ჩვენი პრობლემები კი არც ერთ ხელისუფლებას გულთან არ მიაქვს“, – ამბობს ჟუჟუნა მიქელაძე.

 

 

როგორც მერიის პრესსამსახურში აცხადებენ,  სამხედრო ბატალიონის ყოფილ ტერიტორიაზე შეჭრილ ოჯახებს ბათუმის მერია ვერ დაეხმარება, რადგან მიწის ფართობი, სადაც ეკომიგრანტებისა და ცოციალურად დაუცველების ქოხებია განთავსებული, აჭარის ფინანსთა და ეკონომიკის საკუთრებაშია.

 

 

„ვერც შუქს გაიყვანს მერია, რადგან ეს ოჯახები არ არიან აბონენტები, გამომდინარე იქედან, რომ ტერიტორია არ აქვთ დარეგისტრირებული. რაც შეეხება ნაგვის კონტეინერებს, „სანდასუფთავებამ“ ისინი ცენტრალურ მაგისტრალზე განათავსა, თუმცა ჩასახლებული მოსახლეობა მათ არ იყენებს“, – ამბობს მერიის პრესსამსახურის ხელმძღვანელი ირინა შერვაშიძე.

 

 

აჭარის მთავრობის ეკონომიკური და სოციალური მდგომარეობის ანალიზის დეპარტამენტის ხელმძღვანელი კობა ჩხეიძე „ბათუმელებთან“ საუბარში აცხადებს, რომ აჭარის მთავრობა ამ ოჯახებისთვის აღნიშნული ტერიტორიის საკუთრებაში გადაცემის საკითხს არ განიხილავს.

 

„ბევრი ადამიანი ცხოვრობს გაცილებით უარეს პირობებში, ვიდრე ჩასახლებული მოსახლეობა. ეს მათი არჩევანია, რადგან, როგორც შესწავლის შედეგად გამოირკვა, აქციის მონაწილეების ნაწილს, სხვადასხვა მუნიციპალიტეტში საკუთრება გააჩნიათ. ვისაც არ აქვს საკუთრება, მათ შეუძლიათ იმ დრომდე იცხოვრონ, სანამ ხელისუფლება მათი მდგომარეობის შესწავლას ბოლომდე არ დაასრულებს“.

 

 

 

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე