საქართველოს რკინიგზის დეპარტამენტის ყოფილი ხელმძღვანელის დანაშაულებრივ ქმედებებს დღითი დღე ახალი ცოდვები ემატება. როგორც ჩანს, ჩხაიძეს ბევრ კითხვაზე მოუწევს პასუხის გაცემა და სავარაუდოდ, თავისუფლებაზე დიდი ხნით გამომშვიდობებაც. ყოველივე ამის პარალელურად კი კულუარებში, საქართველოს რკინიგზის დეპარტამენტის ბათუმის ტერიტორიული სამმართველოს უფროსის ნუგზარ ვარშანიძის შესაძლო პასუხისმგებლობის თაობაზეც დაიწყეს საუბარი. თავად ვარშანიძე „გაზეთ ბათუმელებთან“ მისი პასუხისმგებლობის დაყენების საკითხს გამორიცხავს და ამბობს, რომ ყოფილი შეფის ბედი არასდროს ეწევა.
„საქართველოს რკინიგზა ერთი იურიდიული პირია, ჩვენ ამ შემთხვევაში დაქირავებული, შემსრულებელი სტრუქტურა ვართ, რომელსაც მხოლოდ ოპერატიული მართვის უფლება აქვს. ჩხაიძის დანაშაული ის არის, რომ იგი ერთპიროვნულად მართავდა მთელ დეპარტამენტს. მართალია, პროფესიონალი იყო, მაგრამ ასეთ დროს შეცდომების ალბათობა ყოველთვის დიდია“, – აცხადებს ვარშანიძე და დასძენს, რომ ყოფილ შეფს იგი თითქმის პრესით ელაპარაკებოდა: „როცა აჭარის რკინიგზაში ფეთქებადსაშიში ვითარება შეიქმნა და ცენტრისგან უყურადღებოდ დავრჩით, მაშინ პრესის საშუალებით მოვახერხეთ მისი ყურადღების მიქცევა. სხვათა შორის, ამან შედეგი გამოიღო და მაშინდელი პრობლემა გარკვეულწილად მოგვარდა. სამაგიეროდ, ჩხაიძე ამ პოსტზე ჩემს ყოფნას ვერ ეგუებოდა და სულ განთავისუფლებას ცდილობდა.“
ნუგზარ ვარშანიძე ყოფილი შეფის სხვა ცოდვებსაც იხსენებს. „ჩხაიძე კუთვნილ თანხებს არ გვიგზავნიდა, ამით ჩვენ ვზარალდებოდით, საგადასახადოს ყადაღის სახით ჩვენგან იძულებით მიჰქონდა თანხები, რის გამოც უშემოსავლოდ ვრჩებოდით“, – ამბობს ვარშანიძე და მისი გავლენის სფეროში ფინანსური მაქინაციების განხორციელების შესაძლებლობას გამორიცხავს. თუმცა, სამმართველოს უფროსი ამაში ბოლომდე დარწმუნებული არ არის და აცხადებს, რომ იგი ამ საქმეში კარგად ჩახედული არაა. „თეორიულად ყველაფერი შესაძლებელია, მაგრამ პრაქტიკულად რა გაკეთდება არ ვიცი… თუ ჩხაიძე ვაგონებს ჭრიდა და გაჰქონდა, ეს ჩემი კომპეტენცია არ არის. ასეთ საკითხებს ის ქონების მართვის სამინისტროსთან შეთანხმებით აკეთებდა, როცა საქმეს გადავხედე, ყველაფერი თითქოს დოკუმენტაციით იყო გაკეთებული, მაგრამ დარღვევები მაინც აღმოჩნდა“, – ამბობს ვარშანიძე.
მისივე თქმით, ვაგონების დაჭრა-გატანასთან დაკავშირებულ ბრალდებებში ნუგზარ ვარშანიძის სახელი არსად ამოტივტივდება, რადგან არც ესაა მისი პრეროგატივა. ამ მხრივ დარღვევები სამტრედიისა და ხაშურის კვანძებში მომხდარა. თუ ბათუმი ამ სკანდალში გაეხვევა, ამაზე პასუხიმგებლობას სავაგონო დეპო აიღებს და არა სამმართველო. „არც უნებური შეცდომების და არც რაიმე საშიშროების მოლოდინის ქვეშ მე არ ვიმყოფები“, – აცხადებს ვარშანიძე.
