საგზაო უსაფრთხოებასთან დაკავშირებული კამპანია – „მართე ფრთხილად!“, „იარე ნელა!“, „იცოდე შენი სიჩქარე – ნუ მოისწრაფებ სიცოცხლეს“ და ა.შ. – სოციალურ ქსელებში მას შემდეგ გააქტიურდა, რაც ქუთაისი-სამტრედიის შემოვლით გზაზე მომხდარ ავტოსაგზაო შემთხვევას სამი ადამიანის სიცოცხლე ემსხვერპლა, ოთხი ადამიანი კი მძიმედ დაშავდა. აქედან ერთ-ერთი, ცნობილი მორაგბის მერაბ კვირიკაშვილის მეუღლე, რამდენიმე დღეში გარდაიცვალა. მას სამი მცირეწლოვანი შვილი დარჩა. ავტოკატასტროფის მიზეზად გადაჭარბებული სიჩქარე დასახელდა. შს სამინისტროში აცხადებენ, რომ ახალი სტრატეგია, რომელიც სექტემბრიდან ამოქმედდება, ავტოკატასტროფების რიცხვს 50 პროცენტით შეამცირებს.
1 389 ავტოსაგზაო შემთხვევა მოხდა საქართველოში 2015 წლის მონაცემებით, აქედან ყველაზე მეტი წილი – 53,4 პროცენტი მსუბუქ ავტომანქანაზე შეჯახება მოდის. მიმდინარე წელს ავტოსაგზაო შემთხვევების რაოდენობა, როგორც ორგანიზაცია „პარტნიორობა საგზაო უსაფრთხოებისთვის“ გვეუბნება, 10-15 პროცენტით არის გაზრდილი. დაზუსტებულ მონაცემებს შს სამინისტრო ყოველი წლის ბოლოს აქვეყნებს.
საქართველოს შს მინისტრის მოადგილე, შალვა ხუციშვილი „ბათუმელებთან“ საუბარში აცხადებს, რომ მალე ამოქმედდება თანამედროვე ვიდეოანალიტიკური სისტემა, რომელიც ავტოკატასტროფების პრევენციას შეძლებს: „ახალი ვიდეოანალიტიკური სისტემა გამოცდილია ლიტვაში, რის შედეგადაც სამართალდარღვევათა რიცხვი 50 პროცენტით შემცირდა. ჩვენ მოვამზადეთ კანონპროექტთა პაკეტი, რომ მხოლოდ არსებული რესურსებით არ გვებრძოლა ამ პრობლემის წინააღმდეგ და შემოგვეტანა ახალი მეთოდოლოგია, ინოვაციური მიდგომები. თუმცა პარლამენტმა ისე დაასრულა მუშაობა, რომ ვერ მოასწრო ამ კანონპროექტის მიღება, ამიტომ სექტემბერში, როცა განახლდება სესიები, მისი განხილვა მოხდება.“
შალვა ხუციშვილი ამბობს, რომ ამჟამად მიმდინარეობს ახალი, თანამედროვე ვიდეოანალიტიკის სისტემის ტესტირება, რომელიც აფიქსირებს როგორც სიჩქარეს, შუქნიშნის დარღვევას, ზოლის გადაკვეთას, რადარსა და რადარს შორის განხორციელებულ სიჩქარეს, ასევე ბევრ სხვა დეტალს.
„ამ სისტემას დიდი შესაძლებლობები აქვს და ყველა დეტალზე პრეზენტაციის დროს ვისაუბრებთ, რომელიც სექტემბრის ბოლოს გვაქვს დაგეგმილი. ვიდეოანალიტიკური სისტემა თბილისში რამდენიმე ადგილზე არის დანერგილი სატესტო რეჟიმში, ამიტომ ჯერ მისით ადმინისტრირებას არ ვახორციელებთ. როცა ტესტირება დასრულდება, დაინერგება ყველგან. შემოდგომიდან ბათუმიც აღიჭურვება ახალი ვიდეოანალიტიკური სისტემით,“ – გვეუბნება ის.
შალვა ხუციშვილის თქმით, ვიდეოანალიტიკური სისტემით ავტოკატასტროფის პრევენცია შესაძლებელია, რადგან როცა კამერა ან რადარი აფიქსირებს სიჩქარის გადაჭარბებას, რადარი ავტომატურად იძლევა განგაშის სიგნალს, რასაც მოჰყვება რეაგირება პატრულის მხრიდან. „სისტემა ითვალისწინებს პოლიციელების სპეციალურ მომზადებას. მთლიანად იცვლება მეთოდოლოგია, თუ როგორ უნდა მოახდინონ რეაგირება და მათი ქმედება გახდება უფრო ქმედითი. ფაქტობრივად, მთელი სისტემა იცვლება. გარდა ამისა, ინერგება ქულათა სისტემა, რომელიც მართვის მოწმობის სარგებლობის დღეს მოქმედ სისტემას ჩაანაცვლებს. მართვის მოწმობაზე ირიცხება ქულათა რაოდენობა, რომელიც ყოველ სამართალდარღვევაზე ჩამოიჭრება და ესეც კარგად იმუშავებს პრევენციაზე.“ მისი თქმით, პირველ რიგში ვიდეოანალიტიკური სისტემები ყველაზე კრიტიკულ ადგილებში დაინერგება, მათ შორის მუნიციპალურ გზებზე, სადაც ყველაზე სახიფათოა მოძრაობა.
ახალი სისტემის დანერგვამდე საქართველოს მთავრობამ დაამტკიცა საგზაო მოძრაობის უსაფრთხოების სტრატეგია, რომლის განხორციელებაზე პასუხისმგებელი საქართველოს ეკონომიკის სამინისტროა.
სტრატეგიის მიხედვით, სამინისტროებისგან შეიქმნება სამუშაო ჯგუფი, რომელიც სფეროს მიხედვით აიღებს თავის წილ პასუხისმგებლობას საგზაო უსაფრთხოების ამაღლებაზე.
„სტრატეგია გულისხმობს როგორც გზების ინფრასტრუქტურის გამართვას, ასევე სახელმწიფო პოლიტიკის გატარებას ავტოპარკინგების მოწესრიგებაზე, 2017 წლიდან ამოქმედდება ახალი პროექტი „უსაფრთხო ქალაქი“, რომლის შემუშავება მიმდინარეობს და რაც მომავალი თაობის ცნობიერების ამაღლებას ემსახურება,“ – გვეუბნება შალვა ხუციშვილი. მისივე ინფორმაციით, პროექტის ფარგლებში – „უსაფრთხო ქალაქი“ შეირჩა 30 საჯარო სკოლა, სადაც დაინერგება საგზაო უსაფრთხოების ინოვაციური სწავლება: „ჩვენ ვაკეთებთ პატარა ქალაქს, სადაც დაინერგება სიმულაციური სწავლება, ბავშვები მოვლენ და ისწავლიან საგზაო მოძრაობის წესებს იმისათვის, რომ მათ ფსიქოლოგიაზე სწორი გავლენა მოვახდინოთ და თავიანთ მშობლებსაც ვუთხრათ, რომ არ დაარღვიონ წესები“.
პროექტის – „მეგობრული გზების“ ავტორი დაორგანიზაცია „პარტნიორობა საგზაო უსაფრთხოებისთვის“ ხელმძღვანელი გელა კვაშილავა მიიჩნევს, რომ გარდა სისტემური ცვლილებებისა, ავტოავარიების შესამცირებლად დიდი მნიშვნელობა აქვს ვიზუალიზაციასაც, რომელსაც სხვადასხვა ქვეყანაში მიმართავენ. დიდი ზომის ბილბორდების დამონტაჟება გამაფრთხილებელი ტექსტითა და შესაბამისი ფოტოებით ისეთ ადგილებში, სადაც მძღოლმა განსაკუთრებული სიფრთხილე უნდა გამოიჩინოს.
„ადამიანებს საკუთარი თვალით უნდა ვაჩვენოთ, რა შეიძლება მოჰყვეს გადაჭარბებულ სიჩქარეს, ამიტომ აქვს გარკვეული ეფექტი გზებზე ბილბორდების განთავსებას. ამ პრაქტიკას ბევრი ქვეყანა იყენებს და ჩვენც შეგვიძლია გამოვიყენოთ კლიპებთან ერთად“ – ამბობს გელა კვაშილავა.
ის მიიჩნევს, რომ სისტემურ ცვლილებებთან ერთად მნიშვნელოვანია საზოგადოების მენტალური ცვლილება: „საზოგადოება არ უნდა იყოს ინდიფერენტული და „ეს მე არ დამემართება“ – მსგავსი მიდგომა უნდა შეიცვალოს“.
