Batumelebi | პანდუსები ქედის სკოლებში პანდუსები ქედის სკოლებში – Batumelebi
RU | GE  

პანდუსები ქედის სკოლებში

 

ქედის მუნიციპალიტეტში, დაბა ქედის, პირველ მაისის, ახოს, გოგიაშვილების, მერისის, ვაიოს საჯარო სკოლებსა და ქედის კულტურის ცენტრის სახლში პანდუსები დაამონტაჟეს. 

 

პანდუსებისთვის ადგილობრივი ბიუჯეტიდან 2 499 ლარი გამოიყო და სამუშაოების შესრულებისთვის ელექტრონული ტენდერი გამოცხადდა. ტენდერში გამარჯვებულმა შპს „საბა-555“-მა საჯარო  სკოლებსა და კულტურის ცენტრის შენობაზე პანდუსები 1905 ლარად დაამონტაჟა. 

 

დაბა ქედის საჯარო სკოლა ქედის მუნიციპალიტეტში ყველაზე დიდკონტინგენტიანია, სკოლაში 420 მოსწავლე სწავლობს, მათგან 17 შეზღუდული შესაძლებლობის მქონე პირია, მათ შორის ერთი ეტლით მოსარგებლე. სკოლის დირექტორი თამარ თავდგირიძე ამბობს, რომ პანდუსების არსებობა სკოლაში მნიშვნელოვანია, არა მარტო სკოლაში ეტლით მოსარგებლე მოსწავლისთვის, არამედ საზოგადოებისთვისაც.

 

 

ქედის საჯარო სკოლის დირექტორი თამარ თავდგირიძე: „ნებისმიერი ბავშვისთვის სკოლაში შესაბამისი გარემო უნდა იყოს, მათ შორის შეზღუდული შესაძლებლობის მქონე მოსწავლეებისთვის. ჩვენს სკოლაში 17 სპეციალური საჭიროების მქონე ბავშვია, აქედან ერთს გადაადგილების პრობლემა აქვს – ეტლით გადადგილდება, ბავშვს ბინაზე ვასწავლით, რადგან ჯანმრთელობის მდგომარეობიდან გამომდინარე ეს ფორმა არის მისთვის მისაღები, მაგრამ არის პერიოდი, როცა სკოლაშიც შეიძლება ეს მოსწავლე მოვიდეს, შესაბამისად, პანდუსიც აუცილებელია. შეიძლება სკოლაში არ სწავლობდეს ეტლით მოსარგებლე მოსწავლე, თუმცა პანდუსის არსებობა აუცილებელია იქედან გამომდინარე, რომ სკოლაში შემოსვლის შესაძლებლობა ნებისმიერ ადამიანს უნდა ჰქონდეს“. 

ნეტგაზეთის მასალების სხვა გამოცემებში გადაბეჭდვის წესი
ეკა ბარამიძე