Batumelebi | სახელფასო პოლიტიკის დეტალები სახელფასო პოლიტიკის დეტალები – Batumelebi
RU | GE  

სახელფასო პოლიტიკის დეტალები

 

აჭარის მაღალმთიანეთის მუნიციპალიტეტების აიპ-ებიდან ხელფასების გაზრდის თხოვნით ადგილობრივ თვითმმართველობაში არა ერთი წერილია შესული. ადგილობრივი ხელისუფლების განცხადებით, ამ ეტაპზე ხელფასების მატება შეუძლებელია. თვითმმართველობებიდან აიპ-ების თანამშრომლები ვერც პრემიას იღებენ, საკრებულოებმა სახელფასო ფონდში პრემიის სახით დამატებით თანხა მხოლოდ გამგეობისა და საკრებულოს თანამშრომლებისთვის გაითვალისწინეს. 


 

 


„ბაგა-ბაღების გაერთიანება“, „კულტურის ცენტრი“, „სახელოვნებო სკოლა“, „სასპორტო სკოლა“, „წყალკანალი“ – ეს იმ აიპ-ების (არასამეწარმეო, არაკომერციული

იურიდიული პირი) ჩამონათვალია, რომლებიც ქედის, შუახევისა და ხულოს მუნიციპალიტეტებში ფუნქციონირებს. გარდა ამისა, ქედაში კიდევ ერთი აიპ-ი, ქედის ისტორიული მუზეუმი და ორი შპს – „წყალკანალი“ და საფეხბურთო კლუბი „ბეთლემი“ ფინანსდება ადგილობრივი ბიუჯეტიდან. ადგილობრივი ბიუჯეტი აფინანსებს საფეხბურთო კლუბს  შუახევშიც  და  „ხულოთაგოს ბაგირგზას“ ხულოს მუნიციპალიტეტში.

 

სტატუსის მიუხედავად განსხვავებული ხელფასები აქვთ არა მარტო აიპებში დასაქმებულ რიგით თანამშრომლებს, არამედ დირექტორებსა და ბუღალტრებსაც კი.

მაღალმთიანეთში ყველაზე დაბალი ხელფასი შუახევის საფეხბურთო კლუბ „შუახევის“ ფეხბურთელებს აქვთ. ფეხბურთელის ანაზღაურება 180 ლარია, დაქვითვის გარეშე. „ადგილობრივი ხელისუფლება დაგვპირდა ხელფასებს დაემატებაო და ჩვენც იმედიანად ვართ“, – გვითხრა საფეხბურთო კლუბის დირექტორმა ავთანდილ ნაკაშიძემ.

 

მწირ ანაზღაურებაზე საუბრობენ „ხულო-თაგოს ბაგირგზის“ თანამშრომლებიც. აქ დასაქმებული 11 თანამშრომლიდან ცხრას ხელფასი 200 ლარია. როგორც დირექტორი ამბობს, ადგილობრივ თვითმმართველობას არაერთხელ გაუგზავნა წერილობითი მოთხოვნა ხელფასების მომატებასთან დაკავშირებით, თუმცა ამაოდ.

 

„საშიშ ობიექტებში მოიაზრება ბაგირგზა, სადაც ჩემი თანამშრომლები 200 ლარზე მუშაობენ. არც პრემიაა გამოყოფილი, მხოლოდ გასულ წელს მივიღეთ მეცამეტე ხელფასი. შვებულებაში რომ გავუშვა თანამშრომელი, მის ნაცვლად სხვა ყოველგვარი ანაზღაურების გარეშე უნდა ვამუშაო“, – ამბობს ორგანიზაციის დირექტორი რევაზ ბოლქვაძე.

 

ანალოგიური პრობლემა აქვთ ხულოს „წყალკანალში“ დასაქმებულ თაამშრომლებს. რიგი თანამშრომლების ხელფასი აქაც 200 ლარია.

200 ლარი აქვთ ხელფასი ქედის კულტურის ცენტრის ანსამბლის წევრებსაც. ქედისგან განსხვავებით 20 ლარით ნაკლებ ხელფასს იღებენ შუახევის ანსამბლის წევრები და კლუბის გამგეები.

 

სამივე მუნიციპალიტეტის აიპ-ების ხელმძღვანელებთან შედარებით ყველაზე დაბალი ხელფასი ქედის ისტორიული მუზეუმის თანამშრომლებს აქვთ, მუზეუმის დირექტორის ხელფასი 400 ლარია. მუზეუმში 13 ადამიანი მუშაობს, მათი ხელფასი 230 ლარია. „ერთ რაიონში მოქმედი ყველა აიპ-ის თანამშრომლის ხელფასი თანაბარი უნდა იყოს, ჩემი თანამშრომლების ხელფასი 230 ლარია. სახელფასო ფონდის გაზრდასთან დაკავშირებით აჭარის მთავრობის თავმჯდომარესა და ქედის საკრებულოს  წერილობითი მოთხოვნა გავუგზავნე, წერილობითი პასუხი არ მიმიღია. საკრებულოში სიტყვიერად მეუბნებიან, რომ ამისთვის ფინანსთა მინისტრის თანხმობაა საჭირო, მინისტრი კი თანხმობას არ გვაძლევსო.

ვცდილობთ შევხვდეთ მინისტრს, ჩვენ ხელფასების გაზრდას ვითხოვთ, ისე რომ გაუთანაბრდეს სხვა ორგანიზაციების ხელფასებს“, – ამბობს მუზეუმის დირექტორი ვაჟა ფარტენაძე.

ქედის საკრებულოს თავმჯდომარის მოადგილის ჯემალ შარაძის თქმით, აღნიშნულ საკითხზე საკრებულო მუშაობს: „ვმუშაობთ, რომ საფინანსო ფონდი წლის ბოლომდე დავაბალანსოთ და ავსახოთ მომავალი წლის ბიუჯეტში. მუნიციპალიტეტის გამგეობაში წამყვანი სპეციალისტის ხელფასი  620 ლარია, აიპ-ების ხელმძღვანელებს კი გაცილებით დაბალი ხელფასები აქვთ. მიზანშეწონილად მიმაჩნია აიპ-ის ხელმძღვანელების ხელფასი გაუტოლდეს განყოფილების ხელმძღვანელების ხელფასს, აიპ-ში დასაქმებულებისა კი – გამგეობის  სპეციალისტების ანაზღაურებას“.

 

შუახევის საკრებულოს თავმჯდომარის განცხადებით, სახელფასო ფონდის ბიუჯეტი სამინისტროსთან შეთანხმებით დადგენილია და ამ ეტაპზე ხელფასების ზრდა შეუძლებელია: „რა საშუალებაც გვაქვს ბიუჯეტში, ამის მიხედვით ვანაწილებთ თანხას. გვექნება შესაძლებლობა – ხელფასები მოიმატებს, ამ ეტაპზე კი ხელფასების ზრდა შეუძლებელია. რაც შეეხება პრემიებს, არამარტო შუახევის აიპ-ებში, არც ერთ

მუნიციპალიტეტის აიპ-ებს არ აქვთ პრემია“, – აცხადებს იური ქათამაძე.

 

აიპ-ების სახელფასო ფონდში არ არის გათვალისწინებული პრემიები, რიგი თანამშრომლები მხოლოდ მე-13 ხელფასს იღებენ, ამ მხრივ გამონაკლისია მხოლოდ ხულოს თეატრი, რომლის სახელფასო ფონდში არც პრემიაა გათვალისწინებული და არც მე-13 ხელფასი. „თეატრის მსახიობი გაცილებით დაბალ ხელფასს იღებს, ვიდრე რომელიმე საჯარო სამსახურის დამლაგებელი. ჩემი ანაზღაურება 380 ლარია, მსახიობების ხელფასი კი – 350 ლარი. 

ბათუმის თეატრის მსახიობებს სამჯერ მეტი ხელფასი აქვთ, გურამ ოდიშარიასთან დავაყენეთ ეს საკითხი, თუმცა მანამდე არაერთხელ მივმართეთ წერილობით კულტურის სამინისტროს, უმაღლესი საბჭოს შესაბამის კომიტეტს, მაგრამ ამაოდ“, – ამბობს ხულოს თეატრის სამხატვრო ხელმძღვანელი როინ სურმანიძე.

 

სტატისტიკური მონაცემებით, მაღალმთიანეთის აიპ-ებსა და იმ შეზღუდული პასუხისმგებლობის საზოგადოებების ხელმძღვანელებს შორის, რომლებიც ადგილობრივი ბიუჯეტიდან ფინანსდებიან, ყველაზე მაღალი ხელფასი შპს ქედის საფეხბურთო კლუბ „ბეთლემის“ დირექტორს ბაქარ ბარამიძეს აქვს (900 ლარი), მინიმალური კი  – ქედის ისტორიული მუზეუმის დირექტორს ვაჟა ფარტენაძეს (400 ლარი).

 

ხელმძღვანელების შემდეგ მაღალანაზღაურებადი მოხელეები ბუღალტრები არიან, ამ მხრივ ხულოს კულტურის ცენტრის ბუღალტერი ლიდერობს, რომლის ხელფასიც 620 ლარია, მინიმალური ხელფასი კი „ხულო-თაგოს ბაგირგზის“ ბუღალტერს აქვს – 200 ლარი.

 

კითხვაზე, რატომ განსხვავდება ერთი და იმავე სტატუსის მქონე თანამშრომლების ხელფასი, ადგილობრივ თვითმმართველობებში პასუხი არ აქვთ. ხულოს მუნიციპალიტეტის საკრებულოს თავმჯდომარე აცხადებს, რომ აიპ-ებში ხელფასების ზრდა  2014 წლისთვის აქვთ დაგეგმილი. ნოდარ თავართქილაძე: „2014 წლის ბიუჯეტში გვინდა შესაძლებლობის ფარგლებში ხელფასის მატება“.

ნეტგაზეთის მასალების სხვა გამოცემებში გადაბეჭდვის წესი
ეკა ბარამიძე