ბოლო დღეებში განვითარებული სტიქიური მოვლენების დროს, მდინარე აკავრეთამ ქედის პარკი, მიმდებარედ საცხოვრებელი სახლის ეზო და სარდაფი დატბორა. წყლისგან დამცავი კედლების მოსაწყობად ქედაში კი მილიონობით ლარია დახარჯული.
მდინარე აკავრეთას სანაპიროს ერთ მხარეს, პარკის დასაწყისიდან – პარკის ბოლო მონაკვეთამდე, აჭარისწყლის ორივე მხარეს ნაპირგამაგრებითი სამუშაოები გასულ წელს დაიწყო და წელს დასრულდა, რაზეც ქედის ადგილობრივი ბიუჯეტიდან მილიონ 737 ათასი ლარი დაიხარჯა.
ხოლო აკავრეთას უბანში, პარკის ბოლოდან საცხოვრებელი კორსპუსების ბოლომდე, დაახლოებით 235 მეტრ მონაკვეთზე, დამცავი კედელი, ქედის გამგებლის დავით დუმბაძის ინფორმაციით, შვეიცარიის დაფინანსებით 2014 წელს მოეწყო. მდინარე აკავრეთასგან თავდასაცავად დამცავი კედლის მოსაწყობად შვეიცარიის საელჩოს 100 000 ევრო ჰქონდა გამოყოფილი, რაც იმას ნიშნავს, რომ დაახლოებით 235 მეტრამდე დამცავი კედლის მოწყობა საელჩოს ამ ოდენობის თანხა დაუჯდა.
კითხვაზე – რატომ დაიტბორა პარკი? მუნიციპალიტეტის გამგებელი პასუხობს, რომ იმ ნაპირგამაგრებითმა სამუშაოებმა, რაც გამგეობამ განახორციელა, გამოცდას გაუძლო, ხოლო წყალმა გაბიონის ის ნაწილი ჩამოშალა, რომელიც შვეიცარიის საელჩოს დაფინანსებით მოეწყო, სამუშაოები კი გამგეობას არ განუხორციელებია. გამგებლის განმარტებით, დამცავი კედელი საჭიროების შესაბამისად არ იყო გაკეთებული. „ნაპირგამაგრებითი სამუშაოების განსახორციელებლად პროექტი მთლიან მონაკვეთზე შევიმუშავეთ, მაგრამ რადგანაც გვაფინანსებდნენ, ეკონომია გავაკეთეთ, აკავრეთას მხარეს ნაპირგამაგრება საელჩოს დაფინანსებით მოეწყო, ქვები მოიტანეს და ჩაწყობის ნაცვლად ჩაყარეს სანაპიროზე. ადიდებულმა წყალმა ქვა გამოაცალა, ქვები წაიღო და პრობლემა შეგვიქმნა, წყალი ნელ-ნელა აცლის ქვებს. დანარჩენი მონაკვეთი, რაც ჩვენ გავაკეთეთ, ამ წყალდიდობამ აჩვენა, რომ კარგად გაკეთებულია და გამოცდას გაუძლო. სავარაუდოდ, 2018 წლის ბიუჯეტის ფორმირებისას თანხას გავითვალისწინებთ, რომ ბოლომდე მოეწყოს წყლისგან დამცავი კედელი და პრობლემა საბოლოოდ მოგვარდეს,“ – ამბობს დავით დუმბაძე.
